Jaqsylyq jasap, janyńa shýaq shashý úshin asa bir jaǵdaıdyń qajeti joq. Muny myna bir izgilikti iske súısingendikten aıtyp otyrmyz. Týǵanynan sal aýrýyna shaldyǵyp, arbaǵa tańylǵan Dos Tólegenov Nura aýdanyndaǵy qarttar úıine eki teledıdar tartý etipti.
Bala jasynan taǵdyr tálkegine tap bolǵan Dos Tólegenov – birinshi toptaǵy múmkindigi shekteýli jan. Synaqqa synbady. Eńbekti súıdi. Teledıdardan bastap túrli tehnıkańyzdy jańǵaqsha shaǵady. Tilin jetik túsinedi.
Áneýgúni aýdan ortalyǵyndaǵy qarttar úıine eki teledıdar syıǵa tartypty. Qarttar úıinde múldem telejáshik joq ekenin estigen Dos Nesipbaıuly: «Qarttarymyz qalaı teledıdarsyz otyrady?» degen oı maza bermeı qoıdy. «Qolymnan keletin jaqsylyǵym ǵoı. Áýeli qazynalarymyzdy rıza etýimiz kerek. Sol kisilerdiń batasy sózsiz qabyl bolady. Sóıtip, ózim arnaıy baryp, tabystap keldim. О́zimde erekshe qýanyp qaldym», deıdi.
«Rasymen, biraz ýaqyt boldy, qarttarymyz teledıdardan alystap qalǵan edi. Dos baýyrymyz qos teledıdarymen úıimizge kirip kelgende qarttarymyz qatty qýandy. Jaqsylyq jasaǵysy kelgen nıetiniń ózi taýdaı ǵoı. Sóıtip, teledıdardy qosyp bergen soń, ózimiz otyryp shaı ishtik. Jansaraıy baı eken. Úlkender batasyn berdi», deıdi qarttar úıiniń basshysy Gúlnár Túsipbekova.
Bul qoly altyn Dos Nesipbaıulynyń alǵashqy qaıyrymdylyǵy emes. Aýyldastaryna únemi qaraılasady. Tipti azyq-túlik sebetin de úlestirip otyrady. «Otaý TV», «ID TV» sekildi qurylǵylardy syıǵa tartyp, onysyn ornatyp ta beredi. Jany jaqsylyq shýaǵyna toly sheberdi aýyldastary da asa qurmetteıdi.
Sheberdiń esimi eline jaqsy tanys. Tipti Qaraǵandy, Astanadan da arnaıy izdep kelip, turmystyq tehnıkalaryn jóndetetin tutynýshylar da bar. Sebebi belgili: tehnıkanyń tilin ábden meńgerip alǵan, jumysyn sapaly atqarady.
Jary Gúlnár ekeýi úsh bala tárbıelep otyr. Úlken uly Nurasyl ákesine ájeptáýir qolǵabys. Kásipterin jetildirý úshin byltyr Úkimetten 1,3 mln teńge kóleminde grant alǵan. Bul qarajatqa shaǵyn sheberhanasyndaǵy jumysty shıratyp, úıiniń janyndaǵy kóliktiń toǵyn jóndeıtin avtosheberhanasyn jabdyqtap alǵan.
– Jaqsy avtoelektrıkter óte az. Men ómir boıy toqpen jumys istep kelemin. Kóliginiń toǵy aqaý bergender de kómek surap keletin. Sondyqtan avtoelektrık qyzmetin qosa alyp júrýdi jón sanadym. Úsh kólikke shaqtalǵan garajym bar. Grant qarajatyna kólikti dıagnostıkalaý úshin qymbat qurylǵylar satyp aldym. Endi aldaǵy ýaqytta sýbsıdııalanatyn jumys oryndaryna bes adamdy jumysqa ornalastyrýdy oılastyryp otyrmyn. Ulym kolledjde avtoelektrık mamandyǵynda oqıdy. Negizgi kómekshi – ulym. Bar úmitim de sonda, – deıdi sheber.
Dos Nesipbaıulynyń ómirinde mynandaı da kedergi bolǵan. Psıhıatrlar «aqyl-esi kem» dep saraptamalyq qorytyndy jasaǵan. Birden sotqa júginip, eńbekke jaramdy ekenin dáleldep shyqqan. «Qajydym, qaıratym az dep otyrýǵa múldem ýaqytym joq», deıdi ózi.
Bir jyldary Dos jol apatyna ushyrap, eki qoly birdeı istemeı qalǵan kórinedi. Ákesi О́zbekstan elinde em-dom alyp jatqanda, uly Nurasyl úıdegi úıilip qalǵan teledıdarlardy ózi jóndep, túsken qarajatty ákesiniń emine jóneltip otyrǵan. Ol kezde mektepte oqıdy.
Ákesi balasynyń tehnıkaǵa qyzyǵýshylyǵyn kishkentaıynan baıqaǵan. Oıynshyq ákelip berse, ony buzyp, qaıta jınaıdy eken. Alty jasynda alǵash ret qolyna dánekerlegishti alyp, qural-jabdyqtardyń túr-túrin ajyrata bilgen. Sóıtip, áke-sheshesi sheberhanadan shyqpaǵan Nurasyldyń teorııalyq baǵyt boıynsha bilimin tereńdetýge jolyn ashady.
Ákesi men uly aıyna 30-ǵa jýyq tapsyrys oryndaıdy. Aýyldan alystamaı-aq altyn qolymen osyndaı kásipti dóńgeletip otyr. Onyń ústine jaqsylyq jasaýdy ómir saltyna aınaldyrǵan.
Qaraǵandy oblysy,
Nura aýdany