QR Premer-mınıstri Oljas Bektenovtiń tóraǵalyǵymen ótken Úkimet otyrysynda «Aýylda densaýlyq saqtaýdy jańǵyrtý» ulttyq jobasyn iske asyrý barysy talqylandy, dep jazady Egemen.kz Úkimettiń baspasóz qyzmetine silteme jasap.
Densaýlyq saqtaý mınıstri Aqmaral Álnazarova ulttyq joba 655 jańa alǵashqy medısınalyq-sanıtarııalyq kómek nysanyn (medısınalyq pýnktiler, feldsherlik-akýsherlik pýnkt, dárigerlik ambýlatorııalar) salýdy, 32 kópbeıindi ortalyq aýdandyq aýrýhanalardy jańǵyrtýdy, sondaı-aq aýyldaǵy densaýlyq saqtaý nysandary úshin 1 100 medısına qyzmetkerin daıarlaýdy kózdeıtinin atap ótti.
Búgingi tańda 92 medısınalyq-sanıtarııalyq alǵashqy kómek obektisiniń qurylysy aıaqtalǵan, 7 medısınalyq mekeme boıynsha jumystar jalǵasyp jatyr, jyl sońyna deıin taǵy 556 nysandy paıdalanýǵa berý josparlanyp otyr. Ulttyq jobanyń qalǵan baǵyttary boıynsha qajetti rásimder men prosester júrip jatyr.
Oljas Bektenovtyń aıtýynsha, qazirgi ýaqytta jobalardyń saraptamasy keshiktirilip jatyr. Budan basqa Ulytaý jáne Qostanaı oblystarynda obektilerdi salý merzimderi aýysty.
Atalǵan máseleler boıynsha О́nerkásip jáne qurylys mınıstri Qanat Sharlapaev, sondaı-aq óńirler ákimderi Berik Ábdiǵalıuly men Qumar Aqsaqalov túsinikteme berdi.
Oljas Bektenov «Aýylda densaýlyq saqtaýdy jańǵyrtý» ulttyq jobasyn júzege asyrý máselesi Úkimette birneshe ret qaralǵanyn, biraq ázirge naqty nátıje joq ekenine toqtaldy.
«О́tken jyly 309 obektini salý josparlanǵan edi. Densaýlyq saqtaý mınıstrligi baqylaýdy álsiretip aldy. Ákimdikter de qurylys oryndaryn anyqtaý, jer ýchaskelerin ýaqytyly bólý boıynsha túrli syltaý aıtyp, máseleni shuǵyl sheshýge nıet tanytqan joq. Jobalaý qujattaryn rásimdeý men saraptama máseleleri de tym kesheýildep ketti. Sondyqtan aýyldyq jerlerdegi medısına obektileriniń qurylysyn bastaý merzimderi buzyldy», dedi Premer-mınıstr.
Úkimet basshysynyń aıtýynsha, byltyr ákimdikter tıptik jobalardy jergilikti jerge baılanystyrýǵa tıis edi, bul jumys ta aıaqsyz qaldy. Jalpy bıyl 239 obektiniń jobalyq qujattamasy daıyn, onyń 109-y boıynsha ǵana merdiger kompanııalar aıqyndaldy. Qalǵandary ázirge naqty isten góri, jalań sóz kúıinde qalyp otyr.
«Qurylys jumystaryn aldaǵy naýryz-sáýir aılarynda bastaý qajet. Densaýlyq saqtaý mınıstrligi bolsa, olardy qarjylandyrý úshin bıýdjettik ótinimderdi berýge asyǵar emes. Ákimdikter de qarjylandyrý máselelerin sheshe almaı keledi. Áli kúnge deıin kópbeıindi ortalyq aýdandyq aýrýhanalardy kúrdeli jóndeý jumystary bastalǵan joq. Sondaı-aq olarǵa medısınalyq jabdyqtar satyp alý isinde de jaǵdaı máz emes. Mundaı prosedýralar kóp ýaqytty alady», dedi Úkimet basshysy.
Oǵan qosa Oljas Bektenov ulttyq joba úshin jıhaz jáne qurylys materıaldaryn jetkizýge otandyq óndirýshilerdi tartý qajettigine nazar aýdardy. Atap aıtqanda, «Samuryq-Qazyna» qory men onyń enshiles uıymdary otandyq taýarlar men qyzmetterdi keńinen satyp alyp, ózimizdiń otandyq taýar óndirýshilerge qoldaý kórsetýge tıis.
«О́tken aptada ǵana jeńil ónerkásip qaýymdastyǵynyń basshysy Ábdikárimova Saltanat «Samuryq-Qazyna» qorynyń taýar satyp alý saıasatyn synǵa alyp, konkýrstarda shıkiliktiń baryn aıtyp, shaǵymdandy. Men kásipkerlerdiń pikirin qoldaımyn. Biz osy saladaǵy jaǵdaıdy túbegeıli ózgertip, otandyq óndirýshilerdi qoldaý júıesin qurýǵa tıispiz», dedi Premer-mınıstr.
Sonymen qatar Úkimet basshysy Ulttyq joba boıynsha jaǵdaıdy jaqsartý úshin jumys qarqynyn barynsha kúsheıtý qajettigin aıtty. Atap aıtqanda, árbir obektiniń qurylysyn qujattardy daıyndaý, qarjylandyrý kezeńinen bastap, ýaqytyly tapsyrǵanǵa deıin kúndelikti baqylaýǵa alý qajet. Sondaı-aq medısınalyq jabdyqtarmen jáne personalmen qamtamasyz etý máselesi de nazardan tys qalmaýǵa tıis.
Úkimet basshysy oblys ákimdikterine О́nerkásip jáne qurylys mınıstrligimen birge 1 sáýirge deıin jobalarǵa vedomstvodan tys keshendi saraptama júrgizýdi aıaqtaýdy tapsyrdy.
«Densaýlyq saqtaý, Qarjy mınıstrlikteri men ákimdikter jobalardy qarjylandyrý máselesin jedel sheshýge tıis», dep túıindedi Oljas Bektenov.