Ǵylym jáne joǵary bilim mınıstrliginiń qoldaýymen Almaty qalasynda memlekettik tildi damytýǵa arnalǵan mobıldi qosymshalardyń úzdik dızaınerlerin anyqtaıtyn «Design Battle» baıqaýy ótti, dep jazady Egemen.kz.
Halyqaralyq aqparattyq tehnologııalar ýnıversıtetinde ótken alǵashqy kásibı UI/UX jáne grafıkalyq dızaınerler baıqaýyn belgili kásipker, venchýrlik ınvestor Keńes Raqyshevtyń «HATÝ» aksıonerlik qoǵamy, «Sábı» qaıyrymdylyq qory uıymdastyrdy.
- «Design Battle» baıqaýy onlaın jáne oflaın formatta ótti. Oǵan Qazaqstannyń túkpir-túkpirinen 220-dan astam dızaıner, al onlaın-translıasııada 150-den astam kórermen qatysty. Baıqaýdyń birinshi kúni etnıkalyq stılde, aıdentıkada jáne dızaınnyń basqa da negizgi aspektilerinde tájirıbesi mol mamandar ótkizgen sheberlik saǵattaryna arnaldy. Ekinshi kúninde qatysýshylar jobalary boıynsha qarqyndy jumys jasady, - deıdi uıymdastyrýshylar.
Nátıjesinde, UX/UI jáne grafıkalyq baǵyttaǵy 70 biregeı joba iriktelip Keńes Raqyshev, «Sábı» qorynyń prezıdenti Ásel Tasmaǵambetova jáne HATÝ mamandary men dızaın salasyndaǵy táýelsiz sarapshylardan quralǵan ádil qazylar alqasyna usynylǵan.
Baıqaý qorytyndysy boıynsha, UX/UI dızaıner Dılnaz Muqashevanyń týyndysy úzdik dep tanylsa, Rýslan Mahmatov ekinshi oryn, Arýjan Raıymqulova úshinshi oryndy enshiledi. Al grafıkalyq dızaın baǵytynda Qasymhan Bulhaıyr top jarsa, Islam Tirkesbaev ekinshi oryn, Ulan Múptekeev úshinshi orynǵa ıe boldy.
Baıqaýdyń jalpy júlde qory – 2 mıllıon teńge. Ár baǵyt boıynsha júldeger komandalar birinshi oryn úshin – 500 000 teńge, ekinshi oryn úshin – 300 000 teńge aldy jáne úshinshi oryn úshin – 200 000 teńgelik sertıfıkattarmen marapattaldy. Sonymen qatar birneshe qatysýshy Keńes Raqyshev jobasynda qazaq tilin úırenýge arnalǵan biregeı qosymshany qurý boıynsha jumys isteýge usynys aldy. Ol jas dızaınerler jasaıtyn zamanaýı qural memlekettik tildi damytýǵa úlesin qospaq.