Ádemilik áıelge tán. Kóktemniń qyzǵaldaǵyndaı qulpyryp ketetin qyz-kelinshekterdiń ajaryn ashatyn alqa, júzik, syńǵyrly syrǵasyn jasaýda ózindik órnegin qalyptastyryp, básekelestikte bási joǵary turatyn qolóner sheberi Merýert Ermekovanyń esimi elge tanys. Qolóner sheberiniń «Altyn tas» atalatyn brendtik buıymdary árdaıym suranysqa ıe. Tabıǵaty kórkem Talǵar qalasynda turatyn Merýerttiń kórer kóz qyzyǵarlyq sáýkeleden bastap, bilezik, shekelik, óńirjıek, alqa, shashbaý syndy áshekeı buıymdary elimizdiń ár túkpirine jóneltiledi. Qolóner sheberiniń osy jyldar ishinde jasaǵan júzdegen buıymdary óz tutynýshylaryn tapqan.
Sondaı-aq monshaqtan jasalǵan ádemi áshekeıleri jyl saıyn kitaphanalar men joǵary oqý oryndarynda, mektepter men mýzeılerde uıymdastyrylatyn qolóner sheberleriniń kórmelerine qatysyp, kórermen yqylasyna bólenýde.
«Áıelderdiń áshekeı buıymdaryn jasaýmen aınalysqanyma on jylǵa jýyqtapty. Saýsaq birikpeı – ıne ilikpeıdi. Sheberqol analarymyzdyń ıgi muralaryn urpaqtan-urpaqqa jetkizýdi maqsat tutyp kelemin. Burymdylarymyz ýaqytty beker ótkizbeı, kóneniń kózindeı kásipti zamanaýı úlgide jańǵyrtyp, jalǵastyrýǵa nıettense nege qýanbasqa?! Kóp bolmaǵanmen ara-tura qyzyqqan qyzdar kelip, tastardy tizip, monshaq, bilezik, basqa da buıymdardy jasaýdyń joldaryn úırenýde. Mudaı da «úırengeniń ózińe jaqsy, istegeniń maǵan jaqsy» deıtin analarymyzdyń aqyly eske túsedi», dep jyly jymıǵan Merýert Ermekova jalpy tastardyń qasıetine senetin yrymshyl halyq ekenimizdi eske saldy.
Tastardan túziletin táspi, bilezik, tumarǵa suranys artqanyn, ásirese, emdik qasıetke ıe nefrıt, shýngıt, káriptas, marjan syndy tastardy jıi paıdalanatyndyǵyn alǵa tartty.
«Nefrıttiń túsi jasyl bolǵandyqtan «musylman tasy» dep atalady. Mysaly, káriptasty zob aýrýyna paıdaly dep esepteıdi. Al shýngıtke er adamdardyń qyzyǵýshylyǵy joǵary», deıdi óz isiniń sheberi.
Monshaq tizýge epti Merýerttiń móldir tastarmen kómkerilgen úkili sáýkelelerine qyzyǵýshylyq basym. Názik saýsaqtaryna ilingen ár tasty joǵary talǵammen úılestire otyryp tizip, bútin bir buıym qurap shyǵarýǵa asa tózimdilik pen eptilik qajet. Al bul óz isin aıryqsha súıetin qolóner sheberiniń eń asyl qasıetteri desek asyra aıtqandyq emes.
Otandyq ónimderi joǵary baǵasyn alyp qana qoımaı, eńbegi erekshe qurmetke bólengen M.Úsenbekqyzy ótken jyly respýblıkalyq «Úzdik kásipker» baıqaýyna qatysyp, «Úzdik kásipker» atansa, jýyrda ǵana «Úzdik isker áıel» tósbelgisin keýdesine jarqyrata taqty.
Almaty oblysy