Qasym-Jomart Toqaev Ulttyq quryltaıdyń úshinshi jıynynda el taǵdyry úshin ózekti máselelerge toqtaldy. Prezıdent qazaq tiliniń qoldanys aıasyn keńeıtý - memlekettiń basty baǵyty, myzǵymas ustanymy ekenin aıryqsha nusqady, dep jazady Egemen.kz.
«Elimizde qazaq tiline degen suranys jyl ótken saıyn artyp keledi. Qazaq tili bıznestiń, ǵylym men tehnıkanyń tiline aınala bastady. Bul úrdisti odan ári damytýdyń eń tıimdi ári tóte joly – aǵartýshylyq.
Qazir iri kitap dúkenderinde qazaq tilindegi týyndylardyń úlesi arta tústi. Sońǵy kezde baspagerlerdiń jańa býyny álemdik bestsellerge aınalǵan shyǵarmalardy aýdaryp júr. Kóptegen kitaptardy shyǵaryp jatyr. Aýdarylǵan kitaptardyń ishinde kórkem ádebıet qana emes, iskerlik baǵyttaǵy týyndylar da kóp. Memlekettik saıasattyń máni – osynda», dedi Q.Toqaev.
Memleket basshysy til taǵdyryna kelgende qur sóz emes, kúndelikti qarym-qatynasta qazaqsha sóıleýdiń mańyzyna toqtaldy.
«Osy tusta, halyqaralyq «Qazaq tili qoǵamy» týraly erekshe atap ótkim keledi. Qazir Ulttyq Quryltaıdyń múshesi Raýan Kenjehanuly bastaǵan jańa býyn ókilderi uıym tizginin qolǵa aldy. Men qoǵamnyń «Qazaq tili» endaýment qoryn qurý týraly usynysyn qoldadym. Osy jaqsy bastamany qolynda qarjysy bar azamattar jalǵastyryp áketti. Tilimizge qamqorlyq tanytqan jandarǵa erekshe rızashylyǵymdy bildiremin. Qaltaly, janashyr azamattar qordy ulǵaıtýǵa úles qosady dep senemin.
Men ekonomıkany damytý úshin «Kreatıvti ındýstrııanyń» mán-mańyzy zor ekenin únemi aıtyp júrmin. Bul memlekettik tildiń bolashaǵy úshin de óte mańyzdy. Qazaq tilin damytamyz desek, qazirgi zamanǵy ádis-tásilderdi barynsha tıimdi paıdalanǵan durys», dedi Prezıdent.