«AMANAT» partııasy fraksııasynyń múshesi, depýtat Nartaı Sársenǵalıev ǵylymnyń teńgeden tarshylyq kórip otyrǵany týraly depýtattyq saýalyn Úkimet basshysyna joldady, dep habarlaıdy Egemen.kz.
«Otandyq ǵylymǵa bólinetin qarajat «jetim qyzdyń júgindeı» bolyp tur. Álem, kelesi kezekte ǵylymnyń qaı salasynda tyńnan túren salamyz, qaı bıikti baǵyndyramyz dep júrgende biz ǵylymǵa aqshany qaıdan tabamyz dep túbi tesik qaltamyzdy túrtkilep otyrmyz. Sodan keıin elden aqyldy bastar ketip jatyr dep san soǵatynymyz jáne bar», dedi depýtat. Depýtattyń aıtýynsha ǵylymǵa jaýaptylardyń «jalpy ishki ónimniń kem degende 1 prosenti ǵylymı zertteýler men óndiriske jumsalsa» dep aıtyp júrgenine talaı jyl bolǵan. Biraq ǵylym jyl saıyn bıýdjetke ǵana qol jaıýǵa májbúr. Bıyl respýblıkalyq bıýdjetten ǵylymdy qarjylandyrýǵa 204 mlrd teńge qarastyrylǵan. Bir eldiń ǵylymyn aıaqqa turǵyzyp, damytý úshin atalǵan soma jetkiliksiz.
«Bul máseleni sheshýdiń, onsyzda kim kóringen búıirinen tespeı soryp, túbi kóringen bıýdjetke salmaq salmaýdyń bir tásili bar. Ol talap zańda taıǵa tańba basqandaı jazylǵan. Iаkı, Qazaqstannyń jerasty baılyǵyn qalaǵanynsha ıgerip, qısapsyz qarjy taýyp otyrǵan kompanııalar aqshasynyń 1 paıyzyn ǵylymdy damytýǵa berýi tıis. Zańda solaı kórsetilgen. Bar bolǵany 1 paıyzyn ǵana. Ǵylym jáne tehnologııalar jónindegi ulttyq keńestiń birinshi otyrysynda Memleket basshysy Qasym-Jomart Toqaev: «Jer qoınaýyn paıdalanýshylardyń óndiriske jumsaıtyn qarjysynyń 1 paıyzyn Ǵylymı-zertteý jáne tájirıbelik-konstrýktorlyq jumystarǵa mindetti ınvestısııa retinde quıýyna aıryqsha nazar aýdarý qajet. Bul rette óndirýshi kompanııalardyń atalǵan shyǵyndaryn ortalyqtandyrýdy jalǵastyrý kerek», dedi. Alaıda qazaqtyń jerindegi baılyqty barynsha qazyp otyrǵan Jer qoınaýyn paıdalanýshy kompanııalardyń sol 1 paıyz qarjysyn ǵylymǵa joldap jatqany jóninde ashyq aqparat joq. Ǵylymnyń naqty qaı salasyna qarjylyq qoldaý kórsetilgeni týraly da anyq derek joq.
Depýtattyń aıtýynsha jer qoınaýyn paıdalanýshy qaı kompanııa ǵylymnyń qaısy salasyna qansha aqsha saldy degen naqty suraqqa salaǵa jaýapty mınıstrlik ókilderi naqty jaýap bere almady. Qazaqtyń jerindegi baılyqty qalaǵanynsha ıgerip, qymbatshylyqtan ábden zárezap bolǵan qazaq halqynyń ǵylymyn damytýǵa aqshasynyń 1 paıyzyn qımaı, zańdy tıisinshe oryndamaı otyrǵan kompanııalardy qatań tártipke shaqyrar kez keldi. Osy oraıda depýtat usynystaryn aıtty:
Jer qoınaýyn paıdalanýshy kompanııalardyń búginge deıin ǵylymǵa naqty qansha qarjy bólgenin, onyń qaıda jumsalǵanyn qatań tekserý kerek. Jer qoınaýyn paıdalanýshy kompanııalar ǵylymǵa dep bólgen 1 paıyz qarajatqa jasalatyn ǵylymı jobalarǵa arnaıy ashyq baıqaý jarııalanýy tıis. Qaı jobanyń utqany, oǵan qansha teńge aýdarylǵany anyq kórsetilýi qajet. 1 paıyzdyq mejeni oryndamaǵan kompanııalarǵa zańǵa sáıkes shara qoldaný kerek. Jer qoınaýyn paıdalanýshy kompanııalar ǵylymǵa dep bólgen qarjyny ortalyqtandyrýdyń tetigin izdeý kerek. Sol úshin arnaıy qor quryp, ǵylymdy qoldaýǵa arnalǵan qarajattyń barlyǵy sonyń qambasyna aýdarylýy tıis. Bul qordyń jumysyn táýelsiz komıssııa baqylaýy kerek, onyń quramyna qoǵam belsendileri mindetti túrde kirýi qajet.
Atalǵan depýtattyq saýal boıynsha zańnamada belgilengen merzim ishinde jazbasha jaýap kútiledi.