Tutas eldi uıystyrǵan Ulystyń uly kúnin elordadaǵy Dostyq úıi de erekshe atap ótti. О́zge etnos ókilderi aqshańqan kıiz úıler tigip, as berip, alys-jaqynnan kelgen qonaqtarǵa syı-qurmet kórsetip, dýmandy toı uıymdastyrdy.
Qazaqy naqyshtaǵy ulttyq kıim, bozkilemde beldesken balýandar, altybaqan tepken jastar men merekeniń árin asha tústi. Eldegi 100-den asa etnos ókili osylaısha «Qosh keldiń, áz Naýryz!» dep Dostyq úıi mańyn qazaq aýlyna aınaldyrdy. Jıylǵan jurttyń qarasy qalyń, biri kórisip, biri dámnen aýyz tıip, arqa-jarqa boldy. Merekeni ulyqtaǵandar arasynda jetpisti eńsergen ájeı Safýra Ǵabıdollaqyzy da bar.
«Naýryz – jyl basy. Tabıǵattyń jańaryp, tirshiliktiń jandanyp, nıettiń tazaryp, jaqsylyqtyń, izgiliktiń oıanatyn shaǵy. Bul meıramda adamı qundylyqtar dáriptelip, salt-dástúrimiz jańǵyrady. Búginde qazaq qoǵamynda aıtýly mereke barsha otandasymyzǵa ortaq azamattyq meıram sıpatyn alyp keledi. Ata saltynda Naýryz meıramy bolmaǵan ózge etnos ókilderi de merekeni toılap júr. Demek eldegi yntymaq pen birlik bekem degen sóz. Kóz kórgen dúnıeni bala sanasynda máńgi saqtaıdy. Mine, osyny jastaıynan uǵynsyn dep, úıdegi eki nemeremdi erte keldim», dedi qala turǵyny.
Asyr salyp asyq atqan balalardyń kúlkisi, úlkenderdiń júzindegi meıirim meıramnyń mańyzyn ǵana emes, eldegi ózge etnos ókilderiniń mádenı baılanysynyń tereńdigin ańǵartty. Kóp uzamaı ulyq toı merekelik konsertke jalǵasty. Dúıim jurtqa Qazaqstan halqy Assambleıasy tóraǵasynyń orynbasary – Prezıdent Ákimshiliginiń Qazaqstan halqy Assambleıasy hatshylyǵynyń meńgerýshisi Marat Ázilhanov júrekjardy tilegin bildirdi.
«Táýelsizdik jyldarynan kúni búginge deıin Naýryz meıramynyń mán-mańyzy artyp keledi. Bıyl Memleket basshysy Qasym-Jomart Toqaevtyń tapsyrmasymen Naýryznamanyń onkúndigi bekitildi. Amal kúninen bastalǵan meıram elimizdiń ár óńirinde joǵary deńgeıde atalyp ótip jatyr. Bul – birlik pen yntymaq, jańǵyrý men jańarý, úmit pen umtylystyń merekesi. Ulys oń, aq mol bolsyn!» dedi ol.
Mereke qarsańynda qaıyrymdylyq jasap, úles qosqan Assambleıa músheleri marapattaldy. Is-sharaǵa elshiler, Astana qalasy ákimdiginiń, memlekettik organdardyń, qoǵamdyq uıymdardyń ókilderi men QHA músheleri, qoǵam qaıratkerleri, qala turǵyndary, qonaqtary qatysty.
«Baýyrlas halyq úshin mereke bereke-birlikten bastaý alady. О́zbek halqynyń Naýryz merekesin qarsy alý salty qazaq dástúrine uqsas. Olar da bul kúnderi bir-birine qonaqqa baryp, san túrli ulttyq taǵam jasap, kúres, báıge, asyq atý sııaqty ulttyq oıyndarymyzǵa qatysyp, tamashalaıdy. Tamyry sabaqtas merekede adamdar bir-birine degen ókpe-renishterin umytyp, keshirimdi bolyp, júrekterin meıirimdilikke toltyrýǵa tyrysady», dedi О́zbekstan Respýblıkasynyń Qazaqstan Respýblıkasyndaǵy Tótenshe jáne ókiletti elshisi Saıdıkram Nııazhodjaev.