Sońǵy 2 aıda elimizde qyzylsha aýrýy 38%-ǵa tómendedi. Qosymsha ımmýndaý sheńberinde vaksınasııalaýǵa jatatyn adamdardyń 92%-y egildi. Bul týraly Densaýlyq saqtaý mınıstrligi habarlady, dep jazady Egemen.kz.
Mınıstrliktiń málimetinshe, qyzylshamen syrqattanǵandar áli de tirkelip jatyr. Osyǵan baılanysty ata-analar balalarynda qyzylshaǵa qarsy ekpeniń bolýyn qadaǵalaýy qajet. Vaksınalaý bolmaǵan jaǵdaıda tirkelgen jeri boıynsha emhanada vaksına alǵan jón.
Qyzylshanyń belgileri JRVI belgilerine uqsas. Dene qyzýy kóteriledi, jótel jáne aýrýdyń 4-5 kúnderi bórtpe paıda bolady. Qyzylsha ensefalıt (mıdyń qabynýy), ókpeniń qabynýy, otıt (qulaqtyń qabynýy) sekildi asqynýlarǵa ákep soǵýy múmkin.
«Qyzylshanyń aldyn alýdyń jalǵyz senimdi quraly – ýaqtyly vaksınalaý. Ekpe 1-6 jas aralyǵyndaǵy balalarǵa júrgiziledi. Vaksınalaý arqyly balalaryńyzdy qyzylshanyń aýyr túrinen jáne onyń saldarynan qorǵaı alasyz. Qazaqstanda qyzylshaǵa qarsy DDU sertıfıkattaǵan qaýipsiz jáne tıimdi vaksına qoldanylady. Elimizde vaksınadan keıingi qolaısyz jaǵdaılar tirkelmegen», delingen mınıstrlik málimetinde.