Bul kúnderi respýblıkalyq «Qyzylorda-Jezqazǵan» avtojolynyń oblys aýmaǵyndaǵy bóliginde jańǵyrtý jumystary qaıta jandandy. Eldiń ońtústigin ortalyqpen baılanystyratyn kúre joldyń 83 shaqyrymyna asfalt jabyndysy tóseldi. Oblys aýqymyndaǵy uzyndyǵy 216 shaqyrym bolatyn avtojol qurylysy 6 ýchaskege bólinip, merdiger mekemeler josparǵa saı jumys júrgizip jatyr.
Qys aılarynda da ınertti materıaldardy ýchaske basyna jetkizý toqtaýsyz júrgizilip, qazir 5 lot boıynsha 24 pen 216 shaqyrym aralyǵynda qurylys jumystary tolyq bastalyp ketipti.
«Onyń ishinde jer jumystary, aınalma joldar salynyp, jasandy qurylǵylar ornatyldy. Sondaı-aq sý ótkizgish quraldar, mal ótkelderi, joldyń jıegin nyǵaıtý da jasalyp jatyr», deıdi «QazAvtoJol» UK» AQ oblystyq fılıaly dırektorynyń orynbasary Ersaıyn Muzafar.
Qurylysty «Jol aktıvteri sapasynyń ulttyq ortalyǵy» RMK oblystyq fılıaly mamandary udaıy baqylap otyr. Byltyr jyljymaly zerthana arqyly 202 nysanǵa tekserý júrgizilip, qurylys materıaldarynan 611 synama alynǵan. Tapsyrys berýshi men merdiger mekemelerge tekserý barysynda anyqtalǵan olqylyqtardy qalpyna keltirýge usynys berilgen. Búginde sol 35 aqaý men zerthanalyq synama qorytyndysymen anyqtalǵan 9 kemshilik tolyq qalpyna keltirildi.
«Jalpy, kúre joldy jańǵyrtý jumystary sala mınıstrliginiń de udaıy nazarynda. Qurylys materıaldary men atqarylǵan jumystardyń normatıvtik talaptarǵa saı bolýyn ortalyq mamandary qatań baqylaýda ustaıtyn bolady», dedi «Jol aktıvteri sapasynyń ulttyq ortalyǵy» RMK oblystyq fılıalynyń dırektory Erbolat Kóshtaev.
Búginde kúre jol qurylysyna 750 adam jumyldyrylyp, turaqty jumyspen qamtylyp otyr. Qyzylorda oblysy aýmaǵyndaǵy 216 shaqyrym jol jospar boıynsha keler jyly paıdalanýǵa beriledi.
Qyzylorda oblysy