Messendjerler men áleýmettik jelilerde sý tasqynynan zardap shekkenderge Eńbek jáne halyqty áleýmettik qorǵaý mınıstrligi tarapynan ótemaqy tólenetini týraly habarlama tarap júr. Vedomstvo ókilderi bul aqparatty joqqa shyǵardy, dep jazady Egemen.kz.
Atalǵan mınıstrliktiń ótemaqy tólemderin júzege asyratyny týraly jalǵan aqparat taratyp jatqan belgisiz tulǵalar tólem alý úshin «Tolyǵyraq» túımeshigin basýdy nemese silteme boıynsha ótýdi usynady. Tıisinshe, habarlamada kórsetilgen silteme paıdalanýshynyń jeke derekterin urlap alý múmkindigin týǵyzady.
Aıta ketsek, Memleket basshysynyń tapsyrmasyna sáıkes sý tasqynynan zardap shekken azamattarǵa jergilikti atqarýshy organdar birjolǵy tólemder tóleıdi. Mólsheri materıaldyq shyǵyndy esepteıtin arnaıy komıssııalardyń sheshimi boıynsha ár óńirde jeke belgilenedi.
Memlekettik qoldaý týraly resmı aqparat tek 1414 nómirinen SMS-habarlamalar arqyly jiberiletinin eske salamyz.