Qyrýar qarjy bólinedi, al joldardy jóndeý jumysynyń aıaǵy kórinbeıdi. Bul sala tek aqsha quıýdy talap etedi. Senator Bekbolat Orynbekov óziniń depýtattyq saýalynda joldardy jóndeý máselesi uzaq jyldar boıy sheshilmeıtini týraly aıtty, dep habarlaıdy Egemen.kz.
Depýtat elimizdiń Prezıdenti Úkimettiń keńeıtilgen otyrysynda jóndeý jumysy aıaqtalmaıtyn respýblıkalyq mańyzdy trassalar máselesin taǵy da kótergenin eske saldy. 2017 jyly bastalǵan Astana – Balqash – Almaty avtojolynda jóndeý jumystary áli aıaqtalǵan joq. Atyraý – Astrahan, Aqtóbe – Qandyaǵash, Taldyqorǵan – О́skemen sııaqty basqa da respýblıkalyq joldarda jóndeý jumystary 5 jyldan astam ýaqyt boıy júrip jatyr.
«Prezıdent buǵan deıin Qaraǵandy oblysyndaǵy jumys saparynda Qaraǵandy – Balqash jáne Balqash – Býrylbaıtal joldarynyń qurylysyn synǵa alyp, jumystardyń baıaý júrip jatqanyna nazar aýdardy. Qaraǵandy oblysy arqyly Qazaqstannyń ońtústigi men soltústigin jalǵaıtyn negizgi magıstral bolǵandyqtan, avtojoldardyń sapasy óńirdiń damýyna erekshe yqpal etetini eske salyndy. Qaraǵandy-Jezqazǵan tas jolynyń mańyzdylyǵyna toqtaldy. Uzyndyǵy 500 shaqyrymnan asatyn bul joldy jóndeý, ortalyq aýdandarmen baılanysty jaqsartýǵa jáne júk aǵynyn ulǵaıtýǵa múmkindik berip, Ulytaý oblysynyń damýyna oń áserin tıgizedi. Osylaısha, eki oblystyń ınvestısııalyq jáne týrıstik baǵytynyń ulǵaıatynyna aıryqsha mán berildi», dep senator Orynbekov Memleket basshysynyń tapsyrmasyn eske saldy.
Depýtattyń pikirinshe, qazir avtojoldardy jóndeýdi aıaqtaý merzimderiniń oryndalmaý qaýpi joǵary. Sonymen qatar qazir jańa magıstraldar salý josparlary aıtylyp jatyr. Depýtat eger búgingi kúni bastalǵan jobalardy aıaqtaýǵa qarjy bolmasa, onda jańa jobalar týraly ne aıtýǵa bolady, dep tańdanysyn bildirdi.
«Atyraý – Astrahan, Aqtóbe – Qandyaǵash, Kúrti-Qapshaǵaı, Qaraǵandy-Balqash jobalary áli kúnge deıin tıisti qarjylandyrýmen qamtamasyz etilmegeniniń sebebi nede? Olardy bıýdjet qarajaty esebinen qosymsha qaryzdarsyz aıaqtaýǵa múmkindik bar ma? Osy jobalardy aıaqtaýǵa Eýrazııalyq damý bankinen qaryz alý qanshalyqty múmkin? Jańa qaryzdardy tartý rásimderi uzaqqa sozylyp, tólem merzimderi buzylmaı ma? Nemese qurylysqa tartylǵan merdigerlik uıymdar aldyndaǵy mindettemelerdiń ýaqtyly oryndalýyna kedergi bolmaı ma? Kólik mınıstrliginiń 12 myń shaqyrym jolyn qamtıtyn uzaq qurylystardy aıaqtaý jáne jańa jobalardy iske asyrý boıynsha naqty qandaı jospar bar?», dep Bekbolat Orynbekov suraq qoıdy.