Tasqynnan zardap shekken óńirlerge eldiń túkpir-túkpirinen kómek legi tolassyz aǵylyp jatyr. Gýmanıtarlyq kómekten ózge, aýyr tehnıkalar asa qajet bolyp tur. Osy oraıda Qonaev, Almaty qalalaryndaǵy stansalardan Batys Qazaqstan oblysyna jóneltiletin arnaıy jáne ınjenerlik tehnıkalar tizbegi jasaldy.
Almaty oblysynan jınalǵan tehnıkalar quramynda júk kóligi, traktor, sý tasyǵysh jáne motorly qaıyqtar bar. Tehnıkany jóneltýge daıyndyq jumystaryna 300-ge jýyq adam jumyldyryldy. Onyń ishinde Tótenshe jaǵdaılar departamenti, «Qazaqstan temir joly» AQ ókilderi, 32363 áskerı bóliminiń 55 áskerı qyzmetkeri atsalysyp, Qonaev qalasynyń ákimdigi qajetti materıaldardy qamtamasyz etip, jabdyqtardy platformaǵa tıedi.
Sonymen qatar elimizge tanymal «Mareven Fýd Tıan-Shan» seriktestigi, jeke kásipker Arsamaqov sý basqan óńirlerge bara jatqan júrgizýshilerdi azyq-túlikpen qamtamasyz etti.
«Almaty oblysy ákimdiginiń bastamasymen Qonaev jáne Almaty qalalarynyń stansalarynan Batys Qazaqstanǵa jalpy sany 166 arnaıy tehnıka jiberildi. Jaqyn mańdaǵy óńirlerden Almaty oblysy jaldaǵan 41 tehnıka apat aımaqtarynda jumysyn bastady. Jaqynda 60 tehnıka, ishinde 4 qaıyq tıelgen 47 platforma jolǵa shyqty. Sonymen qatar 65 tehnıka platformalarǵa tıelip jóneltýdi kútip tur. Ár poıyz daıyn bolǵan boıda jóneltilip otyrady. Ár tehnıkaǵa júrgizýshi taǵaıyndalyp, olar da poıyzdyń basyndaǵy jolaýshylar vagonyna ornalasqan. Bul is-sharaǵa oblys kásipkerleri, kommýnaldyq qyzmetter men oblystyq basqarmalar, sonymen qatar sharýa qojalyqtary qatysyp jatyr. Halqymyzdy qıyn jaǵdaıdan qaıtkende aman alyp shyǵýǵa atsalysamyz», dedi oblys ákiminiń orynbasary Almas Batanov.
Aıdyń basynda oblystyq tótenshe jaǵdaılar departamenti Atyraý qalasyna 33 jeke quram men 13 tehnıka attandyrdy. Bular kúni búginge deıin jumysyn jalǵastyryp jatyr. Abaı aýdanyna 6 qutqarýshy men 2 birlik tehnıka jiberildi. Al endi 4 qutqarýshy men 2 qaıyq jóneltiledi. Jóneltilgen tehnıka shamamen úsh kún jol júrip, ýchaskege jetken soń, barlyq qajetti jumysqa aralasady.
Almaty oblysy