Byltyr Almaty oblysynyń ortalyǵy Qonaev qalasynyń bas jospary bekitilgeni belgili. Atalǵan qujatqa sáıkes, Abaı kóshesi arqyly Arna men 10-shaǵyn aýdandy jalǵastyratyn jol salynyp jatyr. Qurylysqa jaýapty merdiger – «Asar stroı» jaýapkershiligi shekteýli seriktestigi.
Bul kósheniń uzyndyǵy 14,3 shaqyrymdy quraıdy. Aldyn ala bekitilgen jobalyq-smetalyq qujatqa saı, jańadan túsetin joldyń boıyndaǵy ınjenerlik jeliler túgeldeı aýystyrylyp, jańartylady. Onyń ishinde gaz qubyry men elektr jelileri bar. Al kósheniń ózi 4 jolaqty bolmaq. Jol boıynda baq ornalastyrý kózdelip, abattandyrý da qarastyrylǵan.
Sonymen qatar shaǵyn aýdandardyń ishindegi 12 kósheniń jolyna aǵymdaǵy jóndeý jasalady. Jobanyń aıaqtalý merzimi 2025 jylǵa josparlanǵan. Qazir munda 39 aýyr tehnıka men 45 adam qyzmet etip jatyr.
«8, 10-shaǵyn aýdandarda sazdy aýmaqtar kóp bolǵandyqtan, joldyń bıiktigin kóterip, jartasty tastar tóselip jatyr. Bul asfalttyń otyryp ketýiniń aldyn alady. Kóshe boıynan jańbyr, qar sýynyń kedergisiz aǵyp ótýi úshin aryqtar nemese sý arnasyn salý qajet. Bul úshin arnaıy joba ázirlenip jatyr», deıdi qalalyq Jolaýshylar kóligi jáne avtomobıl joldary bóliminiń basshysy Baǵdat Álıev.
Buǵan qosa qaladaǵy 10 kóshege kúrdeli jóndeý jumysy jasalady.
Almaty oblysy