Keshe, 22 sáýirde Zavodskaıa kentindegi «Santık» JShS uıymynyń aýmaǵynda qoıma órtenip, jalyn 500 sharshy metrdi sharpydy. Tilsiz jaý 2 saǵattyń ishinde joıyldy, dep habarlaıdy Egemen.kz Aqmola oblysy Tótenshe jaǵdaılar departamentiniń baspasóz qyzmetine silteme jasap.
Oqıǵa ornyna jetken tótenshelikter otqa oranǵan qoıma aýmaǵynda shynjyrǵa baılanǵan ıt qalyp qoıǵanyn baıqaǵan. О́rtten qorqyp qalǵan ıt ony qutqarǵysy kelgen órt sóndirýshilerdi janyna da jaqyndatpady.
Áriptesteri jalynmen arpalysyp jatqan ýaqytta 3-MО́SB bólimshesiniń komandıri, azamattyq qorǵaý serjanty Shalqar Shákirov shynjyrdy qabyrǵadan julyp alyp, ıtti bosatqan.
Aqmola oblysy TJD qyzmetkerleriniń jedel jáne úılesimdi is-qımyldarynyń arqasynda qurbandar men zardap shekkender anyqtalmady.