Qostanaı oblysy boıynsha Saýda jáne tutynýshylardy qorǵaý departamenti dúkenderge tekserý júrgize bastaıdy. Mamandar dúkenderde satylatyn áleýmettik mańyzy bar taýarlar baǵasynyń ústeme mólsherin belgileıdi. Olardyń arasynda áleýmettik mańyzy bar azyq-túlik taýarlary: nan, qaraqumyq, kúrish, jumyrtqa jáne taǵy basqa ónimder bar, dep jazady Egemen.kz.
Eske salaıyq, Úkimet 19 áleýmettik mańyzy bar taýarlardyń tizimin bekitkeni málim. Onda saýda qyzmetin retteý týraly zańmen 15 paıyz saýda ústemesi qarastyrylǵan, al atalǵan mólsherden asyp ketý – zańnamany buzý bolyp sanalady, ondaı jaǵdaıda departament tıisti shara qabyldaıdy.
«Mysaly, ústemeni tipti 30 paıyzdan asyrǵan kúnbaǵys maıyn satatyn dúkenge aıyppul salyndy», dedi Qostanaı oblysy Saýda jáne tutynýshylardyń quqyqtaryn qorǵaý departamenti basshysynyń orynbasary Azamat Sabyrjan.
Sonymen qatar atalǵan oblys dúkenderinde 15% joǵary ústememen qant, taýyq eti, jumyrtqa ónimderin satqan 21 kásipkerge aıyppul salyndy. Byltyr atalǵan ústemeni asyra paıdalanǵany úshin jazaǵa tartylǵan 55 dúkenniń basym bóligi Qostanaı, Rýdnyı qalalarynda ornalasqan edi. Sondaı-aq mamandardyń aıtýynsha, byltyr buzýshylyqtardyń kóbi úlken sýpermarketterde tirkelse, qazirgi ýaqytta buzýshylyqtar úı mańy dúkenderi arasynda kóbirek baıqalady.
Sonymen qatar etıketkadaǵy baǵadan joǵary baǵaǵa taýar satqan bıznes ıelerine aıyppul salyndy.
«Baǵalar adamdarǵa kórinýi tıis jáne sáıkesinshe adam tólegen kezde baǵanyń chekpen birdeıligin salystyrý kerek. Bıyl úsh jarym aı ishinde departament osyndaı 24 ákimshilik is qozǵady», dedi Azamat Sabyrjan.
Atalǵan aıyppuldardy salýǵa tutynýshylardyń ótinishteri negiz bolǵan eken, olar bul faktilerdi foto jáne chekter arqyly rastaǵan. Saýda departamenti eskertkendeı, eger satyp alýshylar buzýshylyqtardy baıqasa, E-otinish portaly arqyly shaǵym jibere alady nemese Qostanaı qalasy, Ál-Farabı dańǵyly, 115/1 mekenjaıy boıynsha júgine alady.