Bıylǵy kóktem elimiz úshin ońaıǵa soqpady. «Tatýlyqsyz tirlik joq» degen sóz bar. О́ńirlerde sý tasqyny bastalysymen-aq Assambleıa músheleri aldyńǵy shepte júrdik. Gýmanıtarlyq kómek kórsetý úshin Respýblıkalyq jáne óńirlik shtab qurylyp, táýlik boıy tynymsyz eńbek etip jatyr.
Respýblıkalyq shtabtyń jetekshisi retinde sý basqan barlyq óńirlerge birneshe ret baryp, turǵyndarmen júzbe-júz kezdesip, tildesip, qajettilikterin naqtyladyq. Shtab ókilderimen birge áli de zardap shekken azamattar men qutqarýshylardy ystyq tamaqpen, kıim-keshekpen, tósek-oryndarmen jáne basqa da qajetti qural-jabdyqtarmen qamtamasyz etip kelemiz. Mesenattarymyzdyń demeýshiligimen zardap shekken óńirlerge 1 500 tonna azyq-túlik pen alǵashqy qajettilik zattaryn jetkizdik.
«Jumyla kótergen júk jeńil» degendeı, búginde Assambleıa mesenattary zardap shekken eldi mekenderdi qalpyna keltirý jumystaryna da kirisip ketti. Qazirdiń ózinde Batys Qazaqstan oblysyna 14 vagon sement jóneltildi jáne 5 jańa úı turǵyzyp berý jumystary bastalǵaly tur. Árıne, memleket tarapynan da qajetti kómek kórsetilip jatyr.
Eń bastysy – óńirlerdegi halyqtyń uıymshyldyǵy men aýyzbirshiligi. Azamattardyń týǵan jerge degen sheksiz súıispenshiligi – olardyń apatpen kúndiz-túni tynymsyz kúresýinde anyq baıqalady. Bul – eshqashan sarqylmaıtyn kúsh.
2020 jyly Maqtaaral aýdanynda da sý tasqyny bolǵany esimizde. Kóptegen azamatymyz úı-jaıynan aıyryldy. Degenmen memleket birde-bir azamatyn dalada qaldyrmady. Barlyǵyna úı salyp, jol tósep, gaz ben sýyn tartyp berdi. Sol kezde de otandastarymyz el bolyp, bir kisideı jumylyp ol apattan aman-esen shyqtyq. Halyq áli kúnge deıin jedel atqarylǵan iske dán rıza.
Bıylǵy sý tasqyny odan da kólemdi, alaıda, ár qıyndyqpen birge jeńildik bar demekshi, biz bul synaqty aýyzbirshilik pen meıirimdilik, qamqorlyqtyń arqasynda birlese eńseremiz.
Akbarjon ISMAILOV,
Respýblıkalyq tájik etnomádenı ortalyǵynyń tóraǵasy