Sońǵy kúnderi elimizdegi eleýli óndiristik jańalyqtyń biri – «Teńizshevroıl» JShS (TShO) birinshi ólsheý stansııasyn tómen qysymǵa aýystyrý arqyly tıisti qysymdy kóterý júıesin (QKJ) paıdalanýǵa bere otyryp, Teńiz munaı ken ornynda Uńǵyma erneýindegi qysymdy basqarý (UEQBJ) jobasynyń nysandaryn qaýipsiz túrde eksplýatasııalaýdy bastady.
Bul – jalpy Teńizde óndiristi keńeıtýdiń jobasyndaǵy aıtýly kezeń. UEQBJ – uńǵymalardyń erneýindegi qysymdy tómendetý jáne keıinnen qoldanystaǵy zaýyttarǵa qysymdy arttyrý esebinen Teńizdegi kómirsýtekterdi óńdeý zaýyttarynyń jumysyn tolyq qýatta (jylyna shamamen 28 mln tonnaǵa deıin) ustap turýǵa arnalǵan. Qosymsha QKJ kompressorlary iske qosylyp, qalǵan ólsheý stansııalary osy jyldyń sońyna deıin qaıta jabdyqtalmaq.
Sonymen qatar TShO-nyń «Keleshek óndiristi keńeıtý jobasynyń (KKJ) sońǵy kezeńi 2025 jyldyń birinshi jartysynda aıaqtalady dep josparlanyp otyr. Bul TShO-ǵa Teńizde shıki munaı óndirý kólemin jylyna taǵy 12 mıllıon tonnaǵa (kúnine 260 000 barrel) ulǵaıtýǵa múmkindik beredi.
«Bul bizdiń Keleshek keńeıý jobamyzdy qaýipsiz aıaqtaýdaǵy mańyzdy qadam, sondaı-aq bizdiń negizgi óndirisimizdiń Teńizde senimdi jumys isteýine kómektesedi. Bul mejege qol jetkizý QR Úkimetiniń jáne basqa da kóptegen mańyzdy múddeli taraptardyń, sonyń ishinde seriktesterimizdiń, merdigerlik uıymdardyń, bizben jumys isteıtin qaýymdastyqtardyń, daryndy men jumystaryna adal qyzmetkerlerimizdiń turaqty qoldaýynsyz júzege aspaıtyn edi», dedi «Teńizshevroıl» JShS bas dırektory Kevın Laıon.
Búgingi tańǵa deıin KKJ-UEQBJ jobasy aıasynda TShO otandyq taýarlar men qyzmetterdi satyp alýǵa 18 mlrd AQSh dollarynan astam ınvestısııa saldy. Sonymen qatar 4 000-ǵa jýyq jergilikti jumysshy QKJ jobasyna óz úlesin qosý úshin arnaıy daıyndyqtan ótti.
«Men halyqaralyq kompanııalarmen áriptestik pen tehnologııalar almasýynyń nátıjesinde qundy tájirıbe jınaqtaǵan otandyq kompanııalardyń jetistikterimen maqtanamyn», dedi «Teńizshevroıl» JShS bas dırektorynyń orynbasary Kóńilqosh Súıesinov.
«Teńizshevroıl» KKJ-UEQBJ jobasyn qaýipsiz aıaqtaýǵa járdemdesý úshin óz seriktesteri men QR Úkimetimen yntymaqtastyqty jalǵastyrady.
ALMATY