Jalpy, oqý ornyna túsken soń bir kúnimiz bos ótken joq. Bir kúni pikirsaıys, bir kúni «Qutty bilik» ıntellektýaldyq bilim jarysy, kelesi bir kúni «Jýrshoý», ondaı bolmaı ketse, ózimiz is-shara oılap taýyp alamyz. Iаǵnı bilimimiz aýdıtorııadaǵy dárispen shektelgen joq.
Bara sala bizge alty aı til úıretti. Túrik tili men aǵylshyn tilin úırendik: aptasyna 4 kún. Tek juma, senbi kúnderi ǵana mamandyqqa baýlıtyn pánder qoıyldy. «Jýrnalıstıka janrlary», «Qazaq jýrnalıstıkasynyń tarıhy», «Teleradıo negizderi» – sabaqtarymyz da osal emes. Sonaý «Dala ýálaıatynyń gazeti» men «Qazaq» gazeti, «Aıqap» jýrnalynyń tarıhy, shyǵarý barysyndaǵy qıyndyqtary, bári-bárin biz alǵash osy jýrnalıstıka kafedrasyndaǵy dárister barysynda oqyp-bildik. Seıdýlla Sadyqov aǵamyz bastaǵan Bekjigit Serdáli, Álimbet Bostanov, Dosymbek Nysanbaev, Úmit Zulharova, Ashat Sádibekov, Bekjan Esenbaev syndy ustazdarymyz jaqsy bilim berdi. Onyń qadirin, deńgeıin bakalavrıatty bitirip, QazUÝ-ge túskende bildik. Sonda ustazdarymyz «Túrkistan ýnıversıteti senderge jaqsy bilim beripti, bizdiń balalar oqý-bilimnen góri jumysqa erte kirisip ketti», dep birneshe ustaz aıtty.
Jalpy, bizdiń Qoja Ahmet Iаsaýı ýnıversıteti stýdentterdi áleýmettik qamtý jaǵynan da alda boldy. Sebebi tegin tamaq, oqý orny men jataqhana arasynda tegin tasymaldaıtyn avtobýs, jaıly jataqhanamen qamtamasyz etti. Belsendi stýdent bolsań, bir kúnde bir emes, tipti túski jáne keshki as ishýge eki talon beretin. Joǵaryda aıtyp ketkendeı, túrli saıysta oza shaýyp, báıge alsań, aqshalaı syılyǵy óz aldyna. Qysqasy, ne kerek, ýnıversıtettiń osyndaı qoldaýynyń arqasynda alańsyz bilim alyp ári qoǵamdyq jumyspen de aınalysyp, jaı maman emes, kókiregi oıaý, kózi ashyq, qoǵam belsendisi bolyp shyqtyq. Qatarlastarymyz kileń mádenıet saraıyndaǵy bı, án, kóńildiler men tapqyrlar klýbyna qatysatyn ónerpaz, daryndy jastar boldy. Biz bir-birimizben bilim jaǵynan, qoǵamdyq jumysqa qatysý jaǵynan básekeles boldyq, biraq bir úıdiń balasyndaı tatý da boldyq.
Qazirgideı bir-bir uıaly telefonǵa shuqshııý degen joq. Aqparatty kóbine gazet-jýrnaldar, telesıýjetter men baǵdarlamalardan alatynbyz. Kitap oqıtynbyz. Sony otyrystarda talqylap, «Ádebı orta bar ma?» degen sııaqty taqyryptarda jıi pikirsaıys ótkizip turýshy edik. Sonda «jastar ǵoı» dep bálsinbeı, sol tustaǵy ýnıversıtetimizdiń mańdaıaldy professor-oqytýshylary Rahmanqul Berdibaı, Mekemtas Myrzahmetuly syndy taý tulǵalar kelip, qatysyp, óz baǵalaryn berip ketýshi edi. Ol degen biz úshin bir mártebe boldy.
«Qutty bilik» úshin Maqsat Shotaev ustazymyzǵa erekshe alǵys. Fılologııa fakýltetinde dáris beretin aǵaıymyz bos ýaqytynda osy bilim saıysyn uıymdastyryp, jyl saıyn jańa top quryp, burynǵy myqty komandalarmen saıystyryp, kil myqtydan, kim myqtyny aıqyndap beretin. Aı saıynǵy úzdikterden jyl sońynda kýbok ıegeri iriktelip shyǵatyn.
Sol jýrnalıstıka kafedrasynyń qurylǵanyna, mine, 30 jyl tolypty.
Qazir qarap otyrsam, biz keremet stýdenttik shaqty bastan ótkerippiz. Qoja Ahmet Iаsaýı ýnıversıteti dese, kóz aldymyzǵa sol bir qut meken elesteıdi.
Átirgúl TÁShIM,
Jýrnalıster odaǵynyń múshesi