Qazir aldyna maqsat qoıyp, talpynyp, talaptanǵan jasqa bilim alýǵa múmkindik jetkilikti. Kóptegen qarakózimiz elimizden bólek, alys-jaqyn shet memleketterdiń joǵary oqý oryndarynda da «ınemen qudyq qazyp» júr. Keleshektiń kókjıegin keńeıtý jolynda jastarymyzdyń jan-jaqty bilim alǵany durys. Memlekettiń damýyna qajetti tálim alyp, tájirıbe jınap, ultqa paıdasyn tıgizip júrgen ulandarymyz qazirdiń ózinde az emes.
Shetelderdiń mańdaıaldy oqý oryndarynda maman daıarlaýdan elimizdiń qorǵanys salasy da kenje qalǵan emes. Birqatar memleketpen jasalǵan ekijaqty áskerı yntymaqtastyq baǵdarlamalary aıasynda kadr daıarlaý máselesi ózekti bolyp qala beredi.
Elimizdiń Qarýly kúshterinde suranysy óte joǵary áskerı medısına mamandaryn daıarlaý Aqtóbe qalasyndaǵy Áýe qorǵanysy kúshteri áskerı ınstıtýtynyń bazasynda Batys Qazaqstan medısına ýnıversıtetimen birlese otyryp júzege asyrylady. Al shetelde oqytý máselesine kelsek, áskerı-dárigerlik bilim alatyn jastar negizinen Sankt-Peterbýrgtegi áskerı-medısınalyq akademııaǵa oqýǵa jiberiledi.
Bolashaǵynan úmit kúttirgen sondaı jastarymyzdyń biri Mıras Jáken búginde Sankt-Peterbýrg áskerı medısınalyq akademııasynyń 4-kýrsynda oqyp júr. Almaty qalasynda áskerı qyzmetshiniń otbasynda dúnıege kelgen Mırastyń áskerı dáriger mamandyǵyn tańdaýyna birden-bir sebepker – ákesi Ǵabıden Jákenuly. Otbasynda «Er jigit eline qorǵan bolýy kerek» degendi jıi aıtyp otyratyn ákesi eńbek jolyn áskerı bólim medısınalyq pýnktiniń qarapaıym dárigerinen bastaǵan azamat. Semeı, Aıagóz, Almaty garnızondarynda kóship-qonyp júrip qyzmet atqardy. Búginde Qorǵanys mınıstrliginiń Astanadaǵy Bas áskerı-klınıkalyq gospıtalin basqarady. Osynyń bárin kishkentaı kúninen ákesiniń qasynda júrip, kórip ósken Mıras úshin áskerı ómirge jasalǵan alǵashqy qadam deýge bolatyn sııaqty.
Medısına qyzmetiniń polkovnıgi Ǵabıden Aıdarov – Almaty memlekettik medısınalyq ınstıtýtynyń túlegi. Sankt-Peterbýrg áskerı akademııasyn bet-jaq hırýrgııasy mamandyǵy boıynsha bitirgen. Qazaqstan Respýblıkasy Densaýlyq saqtaý isiniń úzdigi. Ákege qarap ósken ul Mıras otbasynda ekinshi bala. Ol «Arystan» mamandandyrylǵan mektebin támamdaǵan. Arnaıy mektepte oqyǵan eki jylda shydamdy, sabyrly, eń bastysy, uqypty ári tártipti bolýǵa úırendi. Áskerı ómirdiń alǵashqy baspaldaǵy murty tebindegen bozbalany shynyqtyryp, shıratty. Er jigitke tán ózine degen senimdilikti qalyptastyrdy.
Bıyl jeltoqsan aıynda ashylǵanyna 226 jyl tolatyn Sankt-Peterbýrg áskerı akademııasynda patsha zamanynyń ózinde qazaq zııalylary bilim alǵan. 1909 jyly atalǵan oqý ornyn (ol kezde Imperatorlyq áskerı medısına akademııasy) Halel Dosmuhamedov, 1911 jyly Nurǵalı Ipmaǵambetov bitirgen. Mıras ta búginde ózi bilim alyp jatqan oqý ornynda ulty úshin qurban bolǵan atalarynyń oqyǵanyn árdaıym maqtanysh tutady. Maqtanysh tutý óz aldyna, sol kisilerdiń atyna kir keltirmeý úshin de sabaǵyn jaqsy oqyp, úzdikter qatarynan tabyldy.
Áskerı ortada tártip te, talap ta, tárbıe de bar. Mıras áskerı ınstıtýtta daıarlyǵy myqty, tájirıbesi mol ofıserlerden sabaq alyp júr. Áskerı dáriger mamandyǵyna oqyp jatqan jigit bolashaqta elimizdiń Qarýly kúshteriniń úzdik ofıserleriniń biri bolǵysy keledi. Talapty jastyń bul talpynysyn baıqaǵan komandırleri Mırasty top starostasy etip saılaǵan.
Qashanda alǵan bilimniń tájirıbemen shyńdalatyny belgili. Mıras ta jyl saıyn Ulttyq ulannyń áskerı-dárigerlik mekemelerinde taǵylymdamadan ótip turady. О́z isiniń sheberi, bilikti áskerı dárigerlerden tálim alyp, tájirıbesin shyńdap otyrady.
– Bala kúnimnen áskerı medısına mamany bolýdy armandadym. Onyń qanshalyqty qıyn ári jaýapkershiligi zor mamandyq ekenin eskerip, sabaqtarymdy jaqsy oqydym. Mektepte oqyp júrip-aq ózimdi áskerı dáriger retinde tanydym, – deıdi kýrsant Mıras Jáken. – Bolashaqta bilikti áskerı dáriger bolyp, elimizdiń medısına salasyn damytýǵa óz úlesimdi qosyp jatsam, armanymnyń oryndalǵany.
Aq jeleńdi jandardyń adam ómirinde qandaı ról atqaratynyn el basyna kún týǵanda kórip júrmiz. Eń bastysy, adamdarǵa qıyn sátte qolushyn sozyp, ajalyna arashashy bolǵanǵa ne jetsin. Júrek qalaýymen qalaǵan arman oryndalady. Biz de Mırastyń ózi qalaǵan mamandyq ıesi atanyp, áke amanatyn oryndaýyna tilektespiz.