Saryaǵash aýdanynyń prokýratýrasy aýdan aýmaǵynda kommýnaldyq qyzmet kórsetetin «Saryaǵash Turmys» MKK qyzmetine taldaý júrgizdi. Nátıjesinde kásiporyn 24 076 tutynýshynyń quqyǵyn buzǵany anyqtaldy, dep jazady Egemen.kz.
Taldaý barysynda kásiporyn ýákiletti organnyń tarıfti bekitý týraly kúshin joıǵan buıryǵyn qoldanyp, 2022-2023 jyldary 51 kásipker sarqyndy sýlardy qabyldaý qyzmeti úshin artyq 38 mln teńgeden astam qarjy tólegeni anyqtaldy.
Sondaı-aq kásiporynnyń ýaqytsha engizilgen ótemdik tarıfti qoldanbaýy jáne aýyz sýmen qamtamasyz etý qyzmetteri úshin tarıf mólsherin óz betinshe asyra belgileýi saldarynan 2022-2023 jyldary 14 eldi mekenniń 24 025 abonenti jalpy 8 708 289 teńge qarajatty negizsiz tólegen.
«Atalǵan buzýshylyqtar boıynsha aýdan prokýratýrasy aýdan ákimine jáne Tabıǵı monopolııalardy retteý komıtetiniń Túrkistan oblysy boıynsha departamentine prokýrorlyq qadaǵalaý aktilerin engizdi. Kásiporyn Qazaqstan Respýblıkasynyń ákimshilik quqyq buzýshylyq týraly kodeksiniń 164-babynyń 5-bóligi boıynsha ákimshilik jaýapkershilikke tartylyp, 4,7 mln teńge aıyppul salyndy, 2 laýazymdy adam tártiptik jaýaptylyqqa tartyldy», delingen Bas prokýratýra habarlamasynda.
Tutynýshylarǵa keltirilgen zalal ýaqytsha ótem tarıfin engizý arqyly óteledi.
Erlan KIIKBAI,
L.N.Gýmılev atyndaǵy EUÝ stýdenti