Gazet betinde Bórli aýdanyndaǵy Berezovka aýylynda balalar men jasóspirimderdiń ýlaný kórinisteri oryn alǵandyǵy týraly buǵan deıin tıisti másele retinde kóterilip jazylǵan bolatyn. Alaıda atalǵan materıal basylymda jarııalanǵan kezde oǵan qandaı da bir bolmasyn ekologııalyq jáne tehnogendik jaıttardyń áserleri tıgeni nemese tımegeni jónindegi naqty derekter keltirilmegen edi.
Osyǵan baılanysty taıaýda «QazGıdromet» RMK dırektorynyń orynbasary Baýbek Samıtov Berezovka aýylynda 2014 jyldyń 25 jeltoqsanynda ornatylǵan jańa ekologııalyq stansa tyń derekterdi tirkeýge kómegin tıgizgenin aıtyp berdi. Ras, dál qazirgi kúni bul stansa tájirıbelik tártipte jumys isteıdi. Soǵan qaramastan, onyń jan-jaqty ekologııalyq monıtorıng júrgizýge septigin tıgizip úlgergeni de dáleldeýdi qajet etpeıdi.
Túıip aıtqanda, munda, ekostansanyń kómegimen kúkirtti sýteginiń qalypty mólsherden sál artqany anyqtalǵan. Aıtalyq qańtar jáne aqpan aılarynda onyń tıisti deńgeıden kóterilý mólsheri anyqtalmaǵan. Munyń basty sebebi dál sol kezde atalǵan qurylǵyny retteý men qondyrý jumystary júrgizildi, deıdi B.Samıtov. Alaıda naýryz aıynyń aıaǵynda ruqsat etilgen konsentrasııanyń eki dúrkin kóterilgeni anyqtalǵan. Sondaı-aq, onyń mólsheri sáýir aıynyń ishinde úsh ret ulǵaıǵan.
Osy oraıda máseleniń myna mánisine toqtala ketken jón. Berezovka aýyly turǵyndaryn ózge aýmaqqa kóshirý jónindegi másele alǵash qozǵala bastaǵan kezde Qazaqstan Respýblıkasy Qorshaǵan ortany jáne sý resýrstaryn qorǵaý mınıstrligi atalǵan aýylǵa osy tektes eki stansany qurýǵa ruqsat bergen eken. Alaıda KPO b,v. sheteldik kompanııasynyń óndiristik aımaǵy KazGıdromettiń baqylaý aýmaǵyna kirmeıtin kórinedi. Bul úshin de Alıans jetekshileri tarapynan qajetti kelisimniń kerektigi belgili bolyp otyr.
«Sonda qalaı bolmaq?» degen saýal eriksiz týyndaıdy. Eger KPO b.v . kompanııa basshylary Berezovka aýylynda ornatylǵan eki ekologııalyq stansanyń kórsetken derekterin moıyndamasa, jáne oǵan kelispese bul qandaı ádilettilik bolar edi? Sondaı-aq, munyń ózi ekologııalyq talaptarǵa sáıkes kele qoıar ma eken?! Osynyń basyn ashyp alý kerek sııaqty.
Temir QUSAIYN,
«Egemen Qazaqstan».
Batys Qazaqstan oblysy,
Bórli aýdany.