Keshe Parlament Senatynyń Tóraǵasy Qasym-Jomart Toqaev TMD Baıqaýshylar mıssııasyn Qazaqstanǵa bastap kelgen TMD Atqarý komıtetiniń tóraǵasy – TMD Atqarýshy hatshysy Sergeı Lebedevti qabyldady.
Q.Toqaev Qazaqstan Respýblıkasy Prezıdentiniń kezekten tys saılaýyna Táýelsiz Memleketter Dostastyǵynan kelgen halyqaralyq baıqaýshylardyń úılesimdi jumystary úshin rızashylyǵyn bildirdi.
S.Lebedev baıqaýshylardyń jumysy úshin jaqsy jaǵdaı jasalǵanyna rızashylyǵyn bildirdi jáne halyqaralyq baıqaýshylar tarapynan prezıdenttik saılaýǵa basa nazar aýdarylyp otyrǵanyn jetkizdi. Saılaý naýqanyna TMD Mıssııasynyń quramynda TMD-nyń 8 elinen 410 baıqaýshy keldi.
TMD Atqarýshy hatshysy TMD baıqaýshylary saılaýdy baıqaýdy Qazaqstan zańnamasy aıasynda, ádildik pen saıası beıtaraptyq qaǵıdalaryn basshylyqqa ala otyryp júrgizetinin atap ótti, dep habarlady Parlament Senatynyń baspasóz qyzmeti.