Qazaqstan dzıýdo federasııasy 60 kelide Parıj Olımpıadasyna baratyn sportshyny qosymsha jekpe-jekter ótkizý arqyly anyqtady, dep jazady Egemen.kz.
Eldos Smetov, Nurqanat Serikbaev, Maǵjan Shamshadın arasynda ótken beldesýlerde birinshi atalǵan sportshynyń baǵy jandy.
Tájirıbeli Eldos Smetov alǵashqy synda Maǵjan Shamshadınnen basym bolsa, keıingi kezeńde Nurqanat Serikbaevty jeńdi.
Osylaısha, tarazdyq sportshy Parıj Olımpıadasynyń joldamasyna qol jetkizdi.
Bıylǵy tórtjyldyqtyń basty básekesi Eldos Smetov úshin úshinshi Olımpıada bolmaq. Buǵan deıin ol 2016 jyly Rıo-do-Janeıroda ótken olımpıada oıyndarynda kúmisten medal taqsa, Tokıo - 2020-da qola medal qanjyǵalaǵan edi.