Erǵalı erledi

Jarysty erkin kúres sheber­leri bastady. Jankúıerler 97 kg salmaq dárejesindegi básekelerdi taǵatsyzdana kútti. Sebebi bul salmaqta qazaqtyń eki birdeı tanymal balýandary baq synady. Birinshisi – Azııa chempıonatynyń tórt dúrkin júldegeri Erǵalı Álisher, ekinshisi – el tarıhyndaǵy tuńǵysh álem chempıony Rızabek Aıtmuhan. Ekeýi bıyl Qazaqstan chempıonatynyń fınalynda kúresip, bul aıqasta alǵashqysy jeńiske jetti. Sonymen qatar, Álisher Bishkekte ótken qurlyq birinshiliginde Olımpııa oıyn­darynyń lısenzııasyna ıelik etti. Majarstandaǵy týrnır osy qos sańlaqtyń qaısysy myqty ekenin anyqtaýshy edi. Biraq bul joly Alashtyń qos apaıtósiniń joldary qıyspady. Rızabek jartylaı fınalda Ázerbaıjannyń týy astynda óner kórsetip júrgen álem chempıonatynyń eki dúrkin júl­degeri, Eýropa chempıony, daǵys­tandyq Magomedhan Mago­medov­ten 7:15 esebimen jeńildi. Álisher bolsa, ırandyq Abdolfazl Baba­loodan basym tústi – 3:2.

Fınalda Magomedov bozki­lemge shyǵýdan bas tartyp, bas júldeni Álisher Erǵalı olja­lady. Al Rızabek Aıtmuhan úshin­shi oryn úshin beldesýde álem chempıonatynyń kúmis jáne Álem kýbogi men Eýropa birinshiliginiń qola júl­degeri, slovakııalyq ­Ba­tyr­­bek Sa­ký­lovty jolynan yǵys­ty­ryp, qola medaldi enshiledi – 3:2.

Asa aýyr salmaqtaǵy Iýsýp Ba­tyrmurzaev Afrıkanyń tórt  dúrkin chempıony, mysyrlyq Kamal Ábdelmotaleba (6:1) men Rıo Olımpıadasynyń qola jáne Tokıo Olımpıadasynyń kúmis júldegeri, úsh dúrkin álem, eki dúr­kin Eýropa chempıony, eki dúr­kin Álem kýboginiń jeńim­pazy, grýzııalyq Geno Petrıash­vılı­den (4:2) aılasyn asyrdy. Biraq fınalda ol Meıson Mark Per­rısten utylyp, kúmis medaldy qanaǵat tutty.

Keshe 86 kg salmaqtaǵy Aza­mat Dáýletbekov bozkilemge shyq­ty. Tusaýkeser kezdesýinde ol Olım­pıada men álem chempıonaty­nyń, Eýropa oıyndarynyń qola júldegeri, qurlyq chempıony, al­banııalyq Maılz Amınmen aı­qasty. Aldaǵy kúnderi biz áıel­der kúresinen Emma Tısına men Marına Sedneva (55 kg), Dıana Kaıýmova men Irına Kýznesova (59 kg), Irına Kazıýlına (65 kg), Jámıla Baqbergenova men Gúl­maral Erke­baevanyń (72 kg) jáne grek-rım kúresinen Aı­dos Sultanǵalı (60 kg), Demeý Jady­raev (77 kg), Nursultan Tursy­nov pen Shámil Ojaev (86 kg), Álim­han Syzdyqov (130 kg) syndy sańlaqtardyń ónerin tamashalaımyz.