Kóp adam kitapty aqyldy bolý úshin, ıakı rýhanı kemeldený úshin oqıdy nemese bul tek oqymystylardyń isi dep oılaıdy. Iá, munyńyz da ras. Desek te ǵalymdardyń zertteýinshe, kitap oqý – aqyldy ǵana arttyrmaıdy, uzaq ómir súrýge de yqpal etedi.
AQSh ǵalymdary kóptegen adamnyń qatysýymen júrgizilgen uzaqmerzimdi zertteý nátıjelerine súıene otyryp, osyndaı tujyrymǵa kelgen.
On eki jylǵa sozylǵan úsh jarym myń adam qatysqan eksperıment kúnine keminde otyz mınýt kitap oqıtyn adamdardyń mezgilsiz ólim qaýpin jıyrma úsh paıyzǵa tómendetetinin kórsetti.
Iel ýnıversıteti qyzmetkerleriniń aıtýynsha, kez kelgen kórkem shyǵarma adamnyń oıyn aýlap, bir sátke ýaıymnan aryltady. Uzaq ómir súrýdiń syry da osynda.
«Infarkt pen ınsýltty týdyratyn negizgi faktor – ýaıym. Al kúızelispen kúresýdiń tıimdi joly – kitap oqý. Qyzyqty hıkaıaǵa birneshe mınýt berilip ketýdiń ózi janyńyzdy tynyshtandyrady. Zertteýdiń nátıjesi – oıǵa qonymdy boljam», deıdi ǵylymı jumys avtorlary.
Sonymen, kitap oqý, ásirese egde jastaǵy adamdar úshin paıdaly. Olar oqyǵan shyǵarmalarynyń arqasynda mıynyń qalypty kognıtıvti fýnksııalaryn tıimdi saqtaı alady. Ǵalymdardyń aıtýynsha oqıtyn egde jastaǵy adamdar, mysaly, alsgeımer aýrýymen aýyrmaıdy.