PETROPAVL.19 qańtar. Soltústik Qazaqstannyń Mamlıýt aýdanyna qarasty Voskresenka aýylynyń 30 jastaǵy turǵynyn ólim aýzynan tótenshe jaǵdaı qyzmetkerleri men shekarashylar qutqaryp qaldy. Bul týraly oblystyq tótenshe jaǵdaılar departamentiniń baspasóz qyzmeti habarlady.
Kórshi aýyldan jem alyp kelýge ketken jigittiń orta jolda traktory isten shyǵyp, aq tútek boranda qalyp qoıady. Denesin aıaz qaryp, aıaq-qoly jaýraı bastaıdy. Kabınada otqa jaǵyp, jylynbaq bolyp kúıip te qalady.
Onyń keshikkkeninen sekem alǵan týystary dabyl qaǵyp, shekarashylar beketinen járdem suraıdy. Alaıda iz, kesý sátsiz aıaqtalady. Tek aýdannan jedel jetken tótenshe jaǵdaı qyzmetiniń ókilderimen birlesip, aýyldan 12 shaqyrym jerde synyp qalǵan traktor men ıesin izdep tabady.
«Traktor buzylǵannan keıin bakta qalǵan janarmaıǵa biraz jylynyp otyrdym. Ol taýsylǵan soń aıaq-qolym ábden qatyp qaldy. О́mirden túńilip, asylyp ólgim keldi. Qutqarýshylarǵa alǵysym sheksiz. Kórer jaryǵym bar eken», deıdi Reseı men Qazaqstan arasyndaǵy shekaradan taıaq tastam jerde adasyp ketken Baqyt Ahmetov. Qoly kúıip, denesiniń úsik shalǵanyn eler emes, din aman oralǵanyna qýanyshty.
Qys kárine mingeli oblys qutqarýshylary men shekarashylar 900-den astam adamdy, 300-ge jýyq tehnıkany qar qursaýynyn qutqarǵan.
О́mir Esqalı.
Derek: Soltústik Qazaqstan oblystyq tótenshe jaǵdaılar departamentiniń baspasóz qyzmeti.
Sýret: news.nur.kz.