Sátbaev Ýnıversıtetiniń Jambyl oblysy Maıly Qarataý jotasynyń mańynda ornalasqan polıgony geologtardyń tájirıbelik ornyna aınaldy, munda 5 kún boıy elimizdiń toǵyz joǵary oqý orny men bir kolledj stýdentteri óz daǵdylary men Jer týraly ǵylym boıynsha bilimderin synasty, dep habarlaıdy Egemen.kz ýnıversıtettiń baspasóz qyzmetine silteme jasap.
Ýnıversıada qorytyndysy boıynsha Semeı geologııalyq barlaý kolledjiniń komandasy 1-oryndy, Sátbaev Ýnıversıtetiniń komandasy 2-oryndy ıelense, úzdik úshtikti Nazarbaev ýnıversıtetiniń stýdentteri túıindedi.
Ýnıversıada baǵdarlamasy ǵalymdar men praktıkterdiń jalpy jáne qurylymdyq geologııa, krıstallografııa jáne mıneralogııa, petrografııa, paleontologııa, gıdrogeologııa jáne geofızıka boıynsha leksııalary men keńesterin qamtydy.
Qatysýshylar úshin shatyrly qosyn quryldy. Olar osynda túnep, kúndiz naǵyz geologtarǵa laıyq, josparlanǵan marshrýttar boıynsha joryqqa shyǵyp, bir-birimen jarysty, mıneraldy tastar men paıdaly qazbalardy qaǵyp ótti. Al keshkisin olar keńse jumystarymen aınalysyp, kartalar jasady jáne kúnimen istegen jumystary týraly gıtaranyń ásem áýenimen ottyń aınalasynda talqylady.
Bolashaq geologtar kásibı sheberlikpen qatar sporttyq saıystarǵa qatysyp, shyǵarmashylyq jarystar da ótkizdi.
Uıymdastyrýshylar sonymen qatar stýdentterge arnalǵan geologııalyq kvest oılastyrdy, bul jas mamandar men geologııa ǵylymynyń kórnekti ókilderine bir-birimen qarym-qatynas jasaýǵa jáne ózara tájirıbe almasýǵa qosymsha múmkindik boldy.
Sátbaev Ýnıversıtetiniń Qarataý geologııalyq polıgony Taraz qalasynan 60 shaqyrym jerde ornalasqan. Ǵalamshar betindegi bul núkte – Jer tarıhynyń mıllıardtaǵan jyldaryn qamtıtyn birneshe geologııalyq dáýirlerge jatady. Bul tabıǵı oqý quraly ǵalamshar tarıhyna qol jetkizýge, geologııalyq prosesterdiń dálelderin óz kózińizben kórýge jáne qazaqtyń uly ǵulama ǵalymy Qanysh Imantaıuly Sátbaevtyń izimen zerdeleı otyryp, olardy qoldaǵy balǵamen ashyq geologııalyq karta arqyly túısinýge múmkindik beredi.
«Bizdiń jer qoınaýymyzdyń ken resýrstary orasan zor ekenine jáne Mendeleev tablısasyndaǵy barlyq metaldardyń bar ekenine qaramastan, kóptegen ken qorlarymyz sonaý keńestik kezeńnen beri barlanyp keledi, olardyń kóbi sarqylýǵa jaqyn. Qazirgi jaǵdaıda geologııa salasyna jańa kózqaras, jańa izdenis qajet, bul kómirsýtekter salasyndaǵy ǵana emes, sonymen qatar sıfrlyq ındýstrııaǵa jáne basqa da salalarǵa qajetti sırek kezdesetin metaldar salasynda jańa ken oryndaryn ashý arqyly ekonomıkany damytýǵa eleýli múmkindikter týǵyzady», deıdi Sátbaev Ýnıversıteti Q.Turysov atyndaǵy Geologııa jáne munaı-gaz isi ınstıtýtynyń dırektory Asqar Syzdyqov.
Ýnıversıadany ótkizýge bastamashy bolǵan – Qazaqstan Respýblıkasynyń Geologııa komıteti, al negizgi uıymdastyrýshysy – Sátbaev Ýnıversıtetiniń Q.Turysov atyndaǵy Geologııa jáne munaı-gaz isi ınstıtýty. Ýnıversıtet barlyq daıyndyqty óz qolyna aldy, baı jáne jan-jaqty konkýrstyq baǵdarlama ázirledi, jetekshi mamandardy tartyp, qatysýshylar úshin barlyq qajetti jaǵdaılardy qamtamasyz etti. Atalmysh is-sharaǵa «Qazaqmys Barlaý», «ERG Exploration» jáne «KAZ Minerals» sekildi iri kompanııalar qoldaý kórsetip, Ýnıversıadany joǵary deńgeıde ótkizýge múmkindik berdi, al elimizdiń ár óńirindegi ýnıversıtetter men kolledjderden kelgen belsendi ókilderi is-sharaǵa úlken mán berdi.