Búgin elordadaǵy «Nurly jol» vokzalynan bir top bala «Týǵan elge saıahat» tanymdyq poıyzymen jolǵa shyqty. Jetkinshekter 12 kún boıy Qazaqstan óńirlerin aralap, elimizdiń tarıhı-mádenı muralarymen tanysady. Sapar kezinde jas saıahatshylar Astana, Býrabaı, Almaty, Taraz, Túrkistan, Baıqońyr qalalaryn aralaıdy.
Jobanyń kózdegen maqsaty – balalardyń jan-jaqty damýyna, Qazaqstannyń tarıhı-mádenı muralarymen tanysýyna múmkindik týǵyzý. Saıahat barysynda balalar birqatar qalalardy aralap qana qoımaı, tálimgerler olardy tabıǵat pen qorshaǵan ortany aıalaýǵa baǵyttalǵan ekologııalyq ádetterge baýlıtyn bolady.
Bıyl jobaǵa 10 men 15 jas aralyǵynda 400 bala qatysady.
«Samuryq-Qazyna» AQ qarjylandyratyn tanymdyq-týrıstik poıyz altynshy márte jolǵa shyǵyp otyr. Áleýmettik joba buǵan deıin 5 jyldyń ishinde 3 myńǵa jýyq balany qamtyp úlgerdi.
«Qymbatty balalar, sizderdi alda qyzyqty saıahat sapary kútip tur. Elimizdiń kórikti jerlerin aralap, mádenı-tarıhı muralarmen tanysasyńdar. «Samuryq-Qazyna» árqashan balalarǵa qoldaý kórsetýge daıyn. Sizder sapaly bilim alyp, jan-jaqty damý úshin biz barlyq jaǵdaıdy jasaımyz», dedi Qor basshysy Nurlan Jaqypov.
Jobaǵa tabıǵı apattan zardap shekken óńirlerdegi jáne Qor kompanııalar tobynyń shalǵaı jerlerde ornalasqan kásiporyndarynda jumys isteıtin óndiristik qyzmetkerlerdiń balalary shaqyryldy.
Jalpy, buǵan deıin «Samuryq-Qazyna» toby tasqyn saldaryn joıý jumystaryna 22 mlrd teńgeden astam qarajat bólgen bolatyn.
Sapar aldynda «Samuryq-Qazyna» qory «Taza Qazaqstan» respýblıkalyq aksııasy aıasynda balalarǵa ekologııalyq mádenıetti qalyptastyrý týraly sheberlik sabaqtaryn ótkizdi. Máselen, qoqystardy poıyzda nemese tabıǵat aıasynda qaldyrmaı, kerisinshe olardy suryptap, ári qaraı kádege jaratý jáshikterine salýǵa úndedi.
Taǵy bir aıta keterligi, mektep oqýshylary jol boıy tálimger-pedagogterdiń jetekshiligimen túrli úıirmege, zııatkerlik jáne sporttyq oıyndarǵa qatysady.