Ádilet mınıstrliginiń resmı ókili Talǵat Ýálı alaıaqtyqtyń jańa túri paıda bolǵanyn aıtyp, el azamattaryn qyraǵy bolýǵa shaqyrdy. Bul joly alaıaqtar ózderin jalǵan sot oryndaýshylary retinde tanystyryp, bereshegin óteýdi talap etip júr, dep habarlaıdy Egemen.kz.
Talǵat Ýálı elimizde alaıaqtyq faktileri jıilep ketkenin aıtty.
«Jalǵan qyzmetkerler azamattardan qaryzdaryn óteýdi talap etip, ózderin sot oryndaýshysy retinde tanystyryp, shottardyń, múliktiń buǵattalǵany týraly habarlaıdy. Eger sizge osyndaı qońyraý tússe nemese habarlama kelse, aqparatty Ádilet mınıstrliginiń, respýblıkalyq jáne óńirlik jeke sot oryndaýshylar palatasynyń resmı saıttarynda óz betińizshe tekserip, qajet bolǵan jaǵdaıda bankke qońyraý shalýdy usynamyz», dedi Talǵat Ýálı.
Onyń aıtýynsha, derekterdi atqarýshylyq is júrgizý organdarynyń avtomattandyrylǵan aqparattyq júıesinde derbes tekserýge bolady. Bul saıtty ınternet-braýzer arqyly kez kelgen izdeý júıesinen tabýǵa bolady.
«Eger siz boryshker bolsańyz, onda sizdiń qaryzyńyz týraly aqparat, sot oryndaýshysynyń aty-jóni jáne onyń telefony kórsetiledi. Eger siz boryshker bolmasańyz, onda qyzǵylt sary túspen «suranys boıynsha eshteńe tabylmady» degen jazý shyǵady. Bul sizdiń shottaryńyz ben múlikterińizge eshkim tyıym sala almaıtynyn bildiredi. Tek resmı derekkózderge senińiz, derekterdi belgisiz tulǵalarǵa bermeńiz», dep naqtylady vedomstvo ókili.