Qonaev qalasynda «Tolaǵaı – alyptar saıysy» atty oblystyq týrnır uıymdastyryldy. Bul sharanyń maqsaty – ulttyq dástúrdi nasıhattaı otyryp, jastardy tózimdilikke baýlý.
«Bizdiń ata-babalarymyz ejelden osyndaı jarystar uıymdastyrǵan. Olarǵa degen qyzyǵýshylyq búgingi kúni qaıta jandanyp keledi. «Tolaǵaı» – tek jarys qana emes, salamatty ómir saltyn nasıhattaıtyn saıys. Sondyqtan biz mundaı jarystardy uıymdastyrý arqyly týǵan jerimizdiń dańqyn arttyrýdy kózdeımiz. Jastar bizdiń batyrlarymyzdyń rýhymen tárbıelenýge tıis», dedi sharanyń saltanatty ashylýynda sóz alǵan Almaty oblysynyń deneshynyqtyrý jáne sport basqarmasynyń basshysy Erbolat Sarabekov.
«Tolaǵaı» alyptar saıysyna 18 jastan asqan, salmaǵy 90 kılodan joǵary jáne sporttyq daıyndyǵy bar erler ǵana qatysty. О́ńirdiń barlyq aýdanynan kelgen alyptar básekeli jarysta birneshe atalym boıynsha baq synasty. Tarqatar bolsaq, 10 kg naızany oń nemese sol qolmen nysanaǵa laqtyrý, 1 mınýt ishinde uzyndyǵy jarty metrlik temir shybyqty jelkede búgý, salmaǵy 100 kg bolatyn tasty belgili bir qashyqtyqqa kóterip tasymaldaý, salmaǵy 100 kg bolatyn bórenemen bir mınýt ishinde otyryp-turý, sondaı-aq salmaǵy 500 kg bolatyn arbany bir mınýt ishinde jyljytý syndy saıystarǵa qatysyp, tolaǵaı kúsh ıesi ekendikterin dáleldeýge tyrysty.
Tolaǵaılar saıysynyń qorytyndysynda Ile aýdanynan kelgen Evgenıı Inkın 1-oryn ıelense, ekinshi orynǵa Kegen aýdanynyń turǵyny Alǵaly Nursultan turaqtady. Al júldeli úshinshi orynǵa talasta Talǵar aýdanynyń tolaǵaıy Myrzataı Baǵlannyń baǵy janyp, týrnır jeńimpazy atandy.
Almaty oblysy