Májilis tóraǵasynyń orynbasary Danııa Espaeva men Májilis depýtaty Juldyz Súleımenova Aqtóbe oblysynyń depýtattarmen jáne áıelder qaýymymen kezdesti. Otyrysta sońǵy zańnamalyq ózgerister talqylandy.
Danııa Espaeva ótken sessııada Májilis áıelder men balalardy áleýmettik, ekonomıkalyq jáne quqyqtyq qorǵaýǵa baǵyttalǵan birqatar zań qabyldaǵanyn aıtty. Eń negizgileri – turmystyq zorlyq-zombylyq pen balalarǵa qarsy qylmyspen kúresýge qatysty túzetýler, kredıt berý kezindegi qaterlerdi azaıtý jáne qaryz alýshylardyń quqyqtaryn qorǵaýǵa baǵyttalǵan túzetýler men «Ulttyq qor balalarǵa» zańy.
Májilis depýtaty Juldyz Súleımenova elimizde áıelder quqyǵyn qorǵaý sharalary tek osy zańmen shektelmeıtinin atap ótti. Aldaǵy ýaqytta eńbek kodeksine qýdalaý uǵymyn engizý josparlanyp otyr. Jynystyq qýdalaýǵa qatysty jaýapkershilik te qarastyrylady. Sondaı-aq depýtat alıment óndirýge kómektesý sharalary qarastyrylyp jatqanyn aıtty.
– Qazir bizde eki sheshim bar. Birinshisi – alıment tólemeı júrgen azamattar úshin jumys berýshilerdiń jaýapkershiligin qarastyrý. Ekinshisi – jalpy alıment tóleý jónindegi memlekettik qor qurý, – dedi Juldyz Súleımenova.
Jıynda Aqtóbe oblysynda belsendi áıelderdiń róli artyp kele jatqany aıtyldy. Qazirgi tańda oblysta kompanııalardy basqaratyn áıelderdiń úlesi 51,1 paıyzǵa jetken. Jalpy, oblys boıynsha kásipkerlerdiń 56,5 paıyzy – áıelder. Basshy áıelderdiń basym bóligi, ıaǵnı 70 paıyzdan astamy bilim berý salasynda jumys isteıdi. Oblystyń barlyq deńgeıdegi máslıhatyndaǵy 205 mandattyń 46-sy nemese 22,8 paıyzy áıel.
Jıynǵa qatysýshylar bilim berý uıymdaryna lısenzııa berý, genderlik teńdikti qoldaý, ajyrasý kezinde múlikti bólý, mektep oqýshylary arasyndaǵy buzaqylyq, balabaqshadaǵy maman tapshylyǵyna qatysty jáne basqa da máselelerdi kóterdi.