Elimizge kóptep týrıst tartýdaǵy álimiz neshik? Byltyrdan beri iske qosylǵan vızasyz rejim Qytaı men Qazaqstan arasyndaǵy týrızmge qanshalyqty serpin berdi? Mıllıardtar elinen keletin týrıster aǵynynyń salmaǵy qandaı?
Týrızm jáne sport mınıstri Ermek Marjyqpaevtyń QHR Mádenıet jáne týrızm mınıstri Sýn Elımen kezdesýinde osy saýaldardyń da jaýaby aıtyldy. Astanada ótken kezdesýde týrızm salasyn óristetý baǵyty boıynsha ekijaqty yntymaqtastyq talqylandy. Byltyrǵy nátıje boıynsha kórshi Qytaı elinen bizge kelgen týrısterdiń sany edáýir artqan.
«Týrızm salasyndaǵy yntymaqtastyqty jandandyrý, týrıster sanyn ulǵaıtý maqsatynda birqatar shara qabyldanyp, ıgi ister júzege asyryldy», degen E.Marjyqpaev 2023 jyly Qytaıdan elimizge kelgen týrıster sany birneshe ese artyp, 367 myń adamǵa jetkenin atap ótti. Sonymen qatar byltyr 311 myń otandasymyz týrıst retinde Qytaıǵa saparlaǵan. Bul kórsetkish byltyrǵa qaraǵanda eki ese kóp. Mınıstr Qazaqstan men Qytaı arasyndaǵy áýe reısteri sany aptasyna 44 reıske deıin artqanyn atap ótti.
«QHR Tóraǵasynyń Qazaqstanǵa memlekettik sapary aıasynda Qytaı medıa korporasııasymen (SMG) eldiń týrıstik áleýetin ilgeriletý maqsatynda týrızm salasyndaǵy ózara túsinistik jáne yntymaqtastyq týraly memorandýmǵa qol qoıylady», dedi E.Marjyqpaev.
QHR Mádenıet jáne týrızm mınıstri Sýn Elı Qytaıdaǵy Qazaqstan týrızmi jyly aıasynda is-sharalar joǵary deńgeıde uıymdastyrylǵanyn, eldestirmek ıgi is eki el arasyndaǵy ekonomıkalyq, saýda jáne gýmanıtarlyq baılanystardy odan ári damytatynyn jetkizdi. Qytaı tarapy Qazaqstan úshin týrızm salasyndaǵy yntymaqtastyqty nyǵaıtýǵa árqashan da ázir ekenin ańǵartty.
E.Marjyqpaev Sýn Elıge saýyn aıtyp, Qytaıdyń Ulttyq quramasy óner kórsetetin V Dúnıejúzilik kóshpeliler oıyndaryn tamashalaýǵa kórshi el týrısterin de shaqyrdy. 8–13 qyrkúıek aralyǵynda Astana qalasynda ótetin dúbirli dodany tamashalaýǵa birneshe elden týrıster keletinin jetkizdi.
Bıyl Qytaıdaǵy Qazaqstan týrızmi jylynyń jabylý rásimin jeltoqsan aıynda Almatyda ótkizý josparlanyp otyr.