Qonaev qalasynyń Mádenıet úıinde Veterınarııa salasy qyzmetkerleri kúnine arnalǵan saltanatty is-shara uıymdastyryldy. Bul kúni sala ardagerleri men jas mamandarǵa Qurmet gramotalary men Alǵyshattar tabystaldy. Is-shara barysynda 4 oblystyq, 11 aýdandyq jáne qalalyq veterınarlyq stansalarǵa 15 jańa avtokóliktiń kiltin saltanatty túrde tabystaý rásimi ótti.
«Veterınarlardyń jumysy aımaqtyń azyq-túlik qaýipsizdigin qamtamasyz etýde mańyzdy ról atqarady. Veterınar mamandarǵa aýyl sharýashylyǵy ónimderiniń tazalyǵy úshin úlken jaýapkershilik júktelgen. Oblysta veterınarlyq medısına salasyna kóp kóńil bólinedi. Atap aıtsaq, shtaty
1 071 qyzmetkeri bar oblystyq veterınarlyq stansa quryldy, juqpaly aýrýlarǵa qarsy vaksınasııa jáne serologııalyq zertteýler júrgizilýde. Janýarlar men adamnyń juqpaly aýrýlarynyń aldyn alý úshin óńirde 1 500-ge jýyq veterınarlyq qyzmetker birlesip jumys isteıdi. Jyl basynan beri oblysta janýarlar men qustardyń 16 túrli asa qaýipti aýrýyna qarsy veterınarlyq-profılaktıkalyq is-sharalar 89 paıyzǵa oryndaldy. Bıyl epızootııaǵa qarsy is-sharalarǵa jumsalatyn shyǵyndar
4 mıllıard 997 mıllıon teńgeni quraıdy, bul ótken jylmen salystyrǵanda 26 paıyzǵa artyq», dep atap ótti oblys ákiminiń orynbasary Almas Batanov.
Bıyl epızootııaǵa qarsy is-sharalarǵa 5 mlrd teńge jumsalady. Jyldan-jylǵa veterınarlyq-sanıtarlyq obektilerdi salýǵa aqshalaı qarajat ulǵaıýda. Veterınarlyq mamandarǵa jalaqyny kóterý úshin qosymsha qarajat bólinip, jalaqy 20 paıyzǵa kóbeıdi. Jalaqyny kóterý esebinen shalǵaı aýyldarda veterınarlyq mamandardy jumysqa ornalastyrý, olardyń turǵyn úı jaǵdaılaryn jaqsartý, eńbek ónimdiligin arttyrý kózdelgen.
Kásibı merekege oraı Balqash aýdany Quıǵan aýyldyq okrýgi veterınarlyq pýnktiniń meńgerýshisi, 38 jyl jumys ótili bar Aıgúl Dúısenbekova Premer-mınıstrden Alǵyshat aldy.
«Búgin biz alǵash ret kásibı merekemizdi atap ótýdemiz. Bul veterınarlardyń mártebesin kóterýmen qatar eńbekke qyzyǵýshylyǵyn arttyrary anyq», dedi marapat ıesi Aıgúl Dúısenbekova.
Almaty oblysy