Qarsylasy kil myqty

Eki dúrkin álem chempıony Nazym Qyzaıbaı 50 kg salmaq dárejesinde rıngke shyǵady. Onyń salmaǵynda álemniń tańdaýly boksshylary jeterlik. 18 jasynan-aq eresekter sapyna ótip, ulttyq qurama múshesi atanǵan Nazym Qyzaıbaı asa jeńil salmaqta (49 kg) jasyndaı jarqyldady. 19-ǵa tolǵanda 2012 jyly Qytaıda ótken álem chempıonatynda qola júldege qol jetkizdi. 2014 jyly Ońtústik Koreıa uıymdastyrǵan álem chempıonatynda 21 jastaǵy qazaq boksshysynyń tegeýrinin 48 kg salmaqta eshkim toqtata alǵan joq. Qazaq sportynyń tarıhynda buǵan deıin qyzdardan álem chempıony atanǵan arý shyqpaı tur edi. Osy olqylyqty qalaqtaı ǵana boksshy bútindedi. Bokstan áıelder arasyndaǵy álem chempıonaty 2016 jyly Astana qala­synda uıymdastyryldy. Asa jeńil salmaqta Qyzaıbaıdyń qyzy qarsylastaryn aıqyn utyp, eki dúrkin álem chempıony ataǵyn en­shiledi. Ázirge qyzdar arasynda mundaı bıikke shyqqan – Nazym ǵana.

Álemde teńdessiz boksshy ekenin eki márte dáleldese de sańlaqqa jazǵy Olımpıada oıyndaryna barý buıyrmady. Ol 48 kg salmaqtan olımpıadalyq 50 kg salmaqqa ótti. Degenmen de Rıo Olımpıadasyna, 2021 jyly Tokıo jazǵy Olımpıada synyna joly túspedi. Jańa salmaqqa 2015 jyly túbegeıli aýysqan sańlaqqa talaı ot pen sýdan ótýge týra keldi. Parıj jazǵy Olım­pıada oıyndarynyń jolda­masy taratylǵan jazǵy Azııa oıyndarynda boksshynyń joly bolmady. Qytaıdyń Hanchjoý qala­synda ótken dodada shırek fı­nalǵa jetip súrindi. Odan keıin Italııada ótken álemdik irik­teý týrnırine bapkerler qura­my Nazymdy emes, Alýa Bal­qy­bekovany qosty. Sońǵy irik­teý týrnıri Taılandta óterde Qyzaıbaı men Balqybekova arasynda sparrıngtik jekpe-jek uıymdastyryldy. Qarsylasyn ta­lassyz jeńgen Nazym lı­senzııalyq týrnırde baryn saldy. Otyzdan asqanda buıyrǵan jol­damanyń joly da, baǵasy da erekshe.

50 kg salmaqta Parıj rın­ginde 22 boksshy kúsh synasady. Olardyń ishinde Tokıo jazǵy Olımpıadasynyń kúmis júldegeri túrik Býse Naz Cha­ky­roglý, álem chempıonatynyń qola júldegeri ıspan Laýra Fýertes, álem chempıonatynyń eki dúrkin qola júl­degeri taı­land­tyq Chýtamat Raksat, Pa­na­­merıka oıyndarynyń chempıo­ny brazılııalyq Karolına de Almeıda, Azııa chempıony óz­bekstandyq Sabına Bobokýlova, Rıo Olımpıadasynyń qola júldegeri ko­lýmbııalyq Ingrıt Valensııa syndy syralǵy boksshylar bar. Nazym Parıj Olım­­pıa­dasyna qatysatyn boks­shylardyń keıbi­rimen buǵan deıin de jekpe-jekke túsip, áleýetin baıqap kórdi.

«Meniń armanym – elimizdiń kók baıraǵyn Olımpıada shy­ńynda jelbiretý. Áıtpese 2016 jyly kásipqoı boksqa aýysýǵa usynys jasap, saýyn aıtyp kelgender boldy. Biraq men boks sportyn tańdaǵanda Olımpıada chempıony atansam dep armandadym. Ulttyq qurama sapynda 15 jylǵa jýyq ýaqytymdy sarp etip, sol mejege jetýge barymdy salamyn», dedi N.Qyzaıbaı.

Boksshynyń jeke bapkeri Dolkýnjan Kamekov taktıkalyq turǵydan tyń baǵytty tańdap, fızıkalyq áleýetti arttyrýǵa da kúsh salyp jatqanyn jetkizdi.

«Nazym olımpıadalyq sal­maqqa aýys­­qanyna on jyldyń júzi boldy. Ol qarsylastarynyń basym kópshiliginiń shama-sharqyn, judyryqtasý tásilin biledi. Keı­birimen tipti ju­dy­ryqtasyp ta kórdi. Nazym bir emes, eki olım­pıadalyq ke­zeńdi ýystan shyǵaryp aldy. Endi sheginerge jol joq, joldamanyń ózin ıelený úshin ishki báse­kelestiktegi tartys ońaıǵa soq­qan joq. Barymyzdy salamyz, jankúıerlerdi qýantýǵa tyrysamyz», dedi eki dúrkin álem chempıonynyń jeke bapkeri.

57 kg salmaq dárejesinde Ka­rına Ibra­gımova dodaǵa qo­syl­ady. Álem chem­pıonatynyń eki dúrkin qola jáne kúmis júl­­­degeri, Azııa chempıony Ka­­rı­na­nyń sal­maǵynda álem chem­pıony ıtalııalyq Irma Testa, Eýropa oıyndarynyń júldegeri ırlan­dııalyq Mı­kaela Ýolsh, kásipqoı boksty da tartysyn kór­gen fransýz Amına Zıdanı, álem chempıony fılıppındik Nestı Petesıo, Eýropa chempıonatynyń júl­degeri túrik Esra Iyldyz da osy salmaq dárejesinde synǵa túsedi.

75 kg salmaqta Valentına Hal­zova maýsym aıynda Taı­landta ótken sońǵy lısenzııalyq týrnırde joldama ıelendi. Álem chempıony, álem birinshiliginiń eki dúrkin júldegeri Valentına Parıj jazǵy Olımpıada oıyn­darynyń medali úshin kil myq­tymen aıqasady. Bul salmaqta álem chempıony úndistandyq Lovlına Borgohaın, Rıo jazǵy Olımpıadasynyń qa­tysýshysy, álem chempıony ma­rokkolyq Hadıdja El-Mardı, 2022 jyly Túr­kııanyń Ystanbul qala­syn­da ótken álem chempıonatynda jeńiske jetken kanadalyq Tammara Tıbo da bar. Demek Va­len­tınanyń da qarsylasy osal deýge áste bolmaıdy.