Qaraǵandydaǵy ferroqorytpa zaýytynda bolǵan tótenshe jaǵdaıǵa qatysty jańa málimet belgili boldy. Zaýytta peshten jalyn atqylap, saldarynan jumysshylar zardap shekti, dep habarlaıdy Egemen.kz.
Qaraǵandyda ferroqorytpa zaýytynyń 8 jumysshysyn jalyn sharpyp, aýyr hálde aýrýhanaǵa tústi. Basym kópshiliginiń jaǵdaıy tym aýyr. Qazir zaýytta jumys ýaqytsha toqtatyldy.
Apat keshe tańǵy 04:00-diń shamasynda oryn aldy. Peshten jalyn atqylaǵan sátte jumysshylar qashyp úlgermegen. 8 adam túrli dene jaraqatyn alǵan. Barlyǵy jedel aýrýhanaǵa jetkizildi
Qazirgi tańda 8 jumyskerdiń 6-ýy asa aýyr hálde jan saqtaý bóliminde jatyr. Ata-analary jandaryn shúberekke túıip, aýrýhanany aınalshyqtap júr. Al, dárigerlerdiń aıtýynsha, tıisti kómektiń barlyǵy kórsetilgen, tipti Astanadan bilikti mamandar kelgen.
- Búkil naýqasqa kerek kómek barlyǵy jasaldy. Zertteýdiń bári, kerek mamandardyń bári qarap shyqty. Astanadan ǵylymı zertteý ınstıtýtynan bas travmatolog kelip, naýqastardy qarap, emdeý sharalaryna qajetti ózgerister engizdi, - dedi H.J. Maqajanov atyndaǵy kópsalaly aýrýhananyń travmatologııalyq ortalyǵynyń basshysy Berik Tóleýbaev.
Oqıǵanyń mán-jaıy anyqtalyp jatyr. Polısııa qylmystyq is qozǵap, tergeýdi bastap ketti.
Al, jumys berýshi YDD Corporation №1 peshten kenetten jalyn shyqqanyn aıtyp, áleýmettik jelide jazbasha málimdeme jasady.
- 2024 jyldyń 20 shildesinde tańǵy saǵat 04:10 YDD Corporation ferroqorytpa zaýytynda shtattan tys jaǵdaı boldy. № 1 peshten kenetten jalyn shyǵyp, nátıjesinde kásiporynnyń 8 jumysshysy ártúrli dárejede jaraqat aldy. Qazirgi ýaqytta zardap shekken jumyskerlerdiń barlyǵy aýrýhanaǵa jetkizilip, olarǵa shuǵyl medısınalyq kómek kórsetilip jatyr. Kompanııa zardap shekkenderge jan-jaqty kómek kórsetýde jáne aýrýhananyń medısınalyq qyzmetkerlerimen únemi baılanysta, - delingen "YDD Corporation" baspasóz qyzmetiniń habarlamasynda.
Eńbek ınspeksııasy da iske kiristi. Arnaıy komıssııa quryp, tekserýdi bastap ketti.