Kegen aýdandyq tarıhı-ólketaný mýzeıiniń jalpy ekspozısııasy ólkeniń baı tabıǵaty men kóne tarıhynan syr shertedi. Mýzeıdiń ornalasqan ǵımaraty – 1933-1934 jyldary Kegen aýdandyq partııa komıtetiniń birinshi hatshysy Oraz Jandosovqa salynǵan úı.
1987 jyly tarıhı-etnografııalyq mýzeı bolyp qurylyp, odan keıingi jyldary Raıymbek aýdandyq tarıhı-ólketaný mýzeıi dep atalsa, eki aýdannyń bólinýine baılanysty 2018 jyldan bastap Kegen aýdandyq tarıhı-ólketaný mýzeıi atalady. Mýzeı qonaqtary taýly óńirdiń tarıhymen qatar, onyń qalyptasýyna úles qosqan qaıratkerlerdiń ómir-deregine qanyǵady.
Mýzeıdiń erekshe jáne qundy eksponattarynyń tiziminde kórnekti jazýshy, qazaq ádebıetiniń klassıgi Berdibek Soqpaqbaevtyń jeke zattary saqtaýly tur.
«Narynqol týyp-ósken aýdanym-aı,Kórkem jer bolmas seniń aýmaǵyńdaı.Keterde senen uzap kózim qımaı,Qyzyl til óleńdetip zaýladym-aı», – dep jazýshynyń ózi jyrlaǵandaı, Berdibek Soqpaqbaev 1924 jyly osy óńirde dúnıege kelgen.
«Ekspozısııa zalyna jazýshynyń ómirine qatysty fotosýrettermen qatar, jeke zattary qoıylǵan. Olardy 2014 jyly qaryndasy Nesipqan Soqpaqbaeva mýzeı qoryna tabystaǵan. Atap aıtsaq, balalar ádebıetiniń klassıgi B.Soqpaqbaevtyń ózi kıgen kostıými men jempiri, kózildirigi, qalamsaby men qoljattyqtyrǵyshy, saǵaty da osy mýzeıde saqtaýly», deıdi mýzeıdiń ekskýrsııa jetekshisi Aıaýlym Aqymjan.
Almaty oblysy