Qazir Almaty oblysynda 13 órt sóndirý bólimi jumys isteıdi. Biraq onyń jetkiliksiz ekendigin Raıymbek aýdanynyń halqymen kezdesýinde oblys ákimi Marat Sultanǵazıev aıryqsha atap ótti. Búginde taǵy 18 órt sóndirý bólimine qajettilik týyndap otyr. Shetin másele shetinen sheshim taba bastady. Oǵan dálel – aýdan ortalyǵy Narynqol aýylynan órt sóndirý bóliminiń ashylýy.
Raıymbek aýdany taýly, nýly aımaq. Sondyqtan tótenshe jaǵdaılar qyzmeti men órt sóndirý beketteri aýadaı qajet. Jalpy, oblysta mamandandyrylǵan bólimshelermen qatar, sala mamandaryna da suranys joǵary. Tapshylyq bar. Almaty oblysynda 474 tótenshe jaǵdaılar qyzmetkeri jumys isteıdi. Al qajettilik myńnan asady. Narynqoldaǵy órt sóndirý bóliminiń ashylýynda oblys basshysy osyndaı statıstıkany atap ótti. Eki eselik júktememen qyzmet etip júrgen azamattarǵa alǵys bildirdi.
«Elimizdiń 80 paıyz aýmaǵynda tabıǵı órttiń qaýiptiligi joǵary. Sondyqtan órt qaýipsizdigi eń birinshi kezekte turǵan másele. Ári barshamyzǵa ortaq. Shyny kerek, respýblıkada dál osyndaı 121 depo qajet. Al Almaty oblysyna 18 nysan salýymyz kerek. Almaty oblysy ákimdigi men apparaty bul iske ári qaraı da qoldaý kórsetetinine senemiz», degen Tótenshe jaǵdaılar mınıstrliginiń komıtet tóraǵasy Ramıl Kamalov bólimshelerdiń ashylýyna yqpal etken oblys basshylyǵyna rızashylyǵyn jetkizdi.
Jańa ashylǵan nysan 288 mln teńgege salynyp, jasaqtalǵan. Munda órt sóndirýshi mamandarǵa qajettiń bári bar. Sý jańa nysanda 17 qyzmetker eńbek etedi.
Almaty oblysy