Respýblıkanyń eń belsendi aýyl áıelderi bas qosyp, aýyldyń turaqty damýyna qatysty syndarly usynystaryn bildire alatyn forým osymen altynshy ret ótkizilip otyr.
«Aýyl áıelderiniń forýmy» áıelder kásipkerligin damytý jáne aýyl turǵyndaryn nátıjeli jumyspen qamtý arqyly aýyldyń ál-aýqaty men turmys sapasyn arttyrýdyń joldaryn izdeıtin, bastamalardy talqylaıtyn alańǵa aınaldy.
Kóshbasshy áıelderdiń qatysýymen ótken sharalar marafony Qostanaıdan bastaý aldy. Bul jıynda Aqmola, Aqtóbe, Qostanaı jáne Soltústik Qazaqstan oblystarynyń ókilderi bas qosty. Osynaý aýqymdy jumystyń nátıjesi bıylǵy qarasha aıynda Astanada barlyq oblystardan kelgen delegasııalardyń qatysýymen ótetin aýyl áıelderiniń VII respýblıkalyq forýmy bolmaq.
– Sońǵy alty jylda aımaqtarda aýyldyq áıelder forýmyn ótkizý dástúrge aınaldy. Jeke sharýa qojalyqtarynyń damýyn, memlekettik baǵdarlamalardyń jańalyqtaryn, áleýmettik saladaǵy jetistikterdi bas qosyp, talqylap jatyrmyz. Forýmǵa qatysýshylar Coca-Cola Belesteri jobasynyń bıznes negizderi jáne Farmer school onlaın fermerlik sharýashylyǵy boıynsha trenıngter arqyly praktıkalyq bilim alady», - dep túsindirdi Qazaqstan aýyl áıelderi forýmyn uıymdastyrý komıtetiniń tóraıymy, Parlament Májilisiniń depýtaty Maıra Aısına.
Forýmǵa kelgen 200-ge jýyq qonaqtyń ishinde kásipkerler men áleýmettik nysandardyń ókilderi bar. Qatysýshylardyń odan da kóp sany Qostanaıdaǵy forýmǵa onlaın qosyldy. Kásipkerler eńbeginiń jemisin jyl saıynǵy «Coca-Cola belesteri» baıqaýynyń jeńimpazdary men Qostanaı oblysynyń qolónershileriniń qatysýymen uıymdastyrylǵan ónim jármeńkesinde kórýge bolady. Qonaqtar qoldan jasalǵan zergerlik buıymdardy, qolóner, sút ónimderin, oıynshyqtardy, úı toqyma buıymdaryn jáne sándik buıymdardy satyp alýǵa múmkindikteri boldy.
О́ńirlik forýmdardyń nátıjesi qarashada Astanada ótetin Qazaqstan aýyl áıelderiniń VII respýblıkalyq forýmy alańynda ár oblystan kelgen delegattardyń qatysýymen ótedi.