Parıj Olımpıadasynyń qola júldegeri Nazym Qyzaıbaı Qazaqstanǵa keldi. Ony týystary men jankúıerleri Almaty áýejaıynan sán-saltanatpen kútip aldy, dep habarlaıdy Egemen.kz.
Jazǵy Olımpııa oıyndarynda áıelder boksynan 50 kg salmaqta judyryqtasqan Nazym Qyzaıbaı ózine kórsetilgen qurmetke alǵys aıtty.
«Jalpy Olımpıada oıyndary jaqsy ótti. Jattyqtyrýshymmen jaqsy daıyndalyp, qolaǵa qol jetkizdik. Halyqtyń kútip alǵanyna qarap, jeńiske jetkenimdi endi sezinip jatyrmyn. Jankúıerlerge myń alǵys. Barsha Qazaqstannyń qoldaýyn sezindim», dedi ol.
Eske salaıyq, 50 keli salmaqta el namysyn qorǵaǵan otandasymyz jartylaı fınalda qytaılyq Vý Iýmen qolǵap túıistirip, tóreshiler sheshimimen utyldy. Osylaısha ol Olımpıada oıyndarynyń qola júldesin qanjyǵasyna baılady.