Úrimshiden jetken qyz

Búrlen Ádiletqyzy – Shyńjań ólkesi, Dórbiljin aýdanynyń týmasy. Bıyl joǵary oqý ornyn baǵdarlama jasaqtaýshy ma­mandyǵy boıynsha támamdaǵan. Ol Qazaqstan – Qytaı arasyn­daǵy yntymaqtastyqty qoldaý maqsatynda saparǵa shyqqan. Eki myń shaqyrymdy artqa tastaǵan Búrlendi elorda jurtshyly­ǵy erekshe yqylaspen qarsy alyp, shashý shashyp, qymyz usyn­dy. Dúnıejúzi qazaqtary qa­ýym­­dastyǵy Astana qalalyq fılıa­lynyń basshysy Ǵalym Úlken­baıuly Búrlendi jeńisi­men qut­tyqtap, Alǵyshat jáne aqsha­laı sertıfıkat tabystady.

«Astanaǵa aman-esen jetip, sizderdi kórgenime óte qýanysh­tymyn. Qarsy alyp jatqan yqy­lastaryńyzǵa kóp rahmet. Bul sapardy kópten beri oılastyryp júr edim. Táýekelge bel býyp, 21 shildede Úrimshi qalasynan jolǵa shyqtym. Basty maqsatym – eki eldiń dostyǵyn nasıhattaý. Bıyl «Bir beldeý, bir jol» jobasyna 10 jyl tolyp otyr. Qazaqstan men Qytaı arasyndaǵy vızasyz rejim ornaǵannan beri saıahatshylardyń sany artyp keledi. Eki el arasyndaǵy dostyq nyǵaıa bersin», dedi ol.

«Jol azabyn júrgen biledi» demekshi, Búrlenniń bul sapary túrli qıyndyq pen qyzyq­qa toly bolǵan.

 «Bul – velosıpedpen shyqqan alǵashqy saıahatym. Kúnine 100-150 shaqyrym jol júrip otyrdym. Kúnniń ystyǵy azdap qıyndyq­ týdyrdy. Qyzýym kóterilip, aýyr­ǵan kúnderim de joq emes. Áýelde jýan dóńgelekti velosıped­pen shyqqanmyn. Biraq ol baıaý júre­tindikten, jińishke dóńgelekke aýystyrdym. Jolda tas, áınek kirip, dońǵalaǵym jarylyp, shynjyrym isten shyqqan kezder boldy. Bárin ózim jóndep aldym. Tańǵy 5-terde shyǵyp, túnde aıaldap otyrdym. Jolda kezdes­ken jandardyń barlyǵy qoldaý bildirip, sýsyn berip, tamaǵymen bólisip, kómekterin kórsetip jatty. Bul sapar ómirimniń bir be­lesi retinde erekshe este qala­tyny sózsiz. Atamekenge tabanym alǵash tıip turǵan joq. Biraq osy jol­ǵy alǵan áserim men tolqyny­sym erekshe», deıdi Búrlen Ádilet­qyzy.

Velosapar kóńilinen shyq­qany sonsha, Búrlen aldaǵy ýaqytta ózge elderdi de aralaýdy josparlap otyr.