Buryn aýdan ortalyǵy bolǵan Shelek aýyly halqynyń sany 35 myńǵa jýyqtaǵan. Byltyr qazan aıynan beri 124 shaqyrym ortalyqtandyrylǵan abonenttik sý qubyrlaryn qosqanda, barlyǵy 270 shaqyrymdy quraıtyn aýyzsý júıesin tartý jumystary júrgizilip jatyr.
«Eńbekshiqazaq aýdanynyń turǵyn úı-kommýnaldyq sharýashylyǵy jáne turǵyn úı ınspeksııasy bólimi» MM tapsyrysymen júzege asyp jatqan jobanyń quny – 5 187 746 teńgeni quraıdy. Bul jumystardy tııanaqty atqarýdy merdiger mekeme – «Aı-Sý Melıorasııa» JShS óz mindetine alǵan.
Qazirgi ýaqytta 9 kóshede 20 arnaıy tehnıka, 55 adam tyńǵylyqty jumys istep jatyr. Nátıjesinde, uzyndyǵy 130,4 shaqyrym ortalyqtandyrylǵan jáne abonenttik qubyrlar tartylyp, 48,3 paıyzǵa qurylys-montaj jumystary júrgizilgeni týraly Shelek aýyldyq okrýginiń ákimi Aıdarbek Daýtqulov habardar etti.
Shelek aýylynda uzyndyǵy 32 shaqyrym bolatyn ortalyqtandyrylǵan káriz jelilerin qaıta jańǵyrtý jáne salý jumystarymen «Elaman» JShS aınalysady. Bastalǵanyna on jylǵa jýyqtaǵan jobaǵa 2019 jyly túzetýler engizilip, memlekettik saraptama qorytyndysy shyǵarylǵan.
Búginde bıologııalyq tazalaý stansasynyń qurylǵylary ornatylyp jatyr. Tazalaý stansasyna 2 tarmaqty elektr jelisi tartylǵan. Byltyr aýyl ishinde tartylatyn 22 shaqyrym káriz júıesiniń (Qaıypov, Jibek joly, Syzdyqov, Rozybakıev, Taırov jáne Qabylov kóshelerimen) 10 shaqyrymy ǵana qazylyp salynǵan. Atalǵan kóshelerge 179 qudyq ornatylǵan.
Sondaı-aq Shelek aýylyn kógildir otynmen qamtamasyz etýde ilgerileý bar. Jeti jyl buryn bastalǵan gaz tartý jumysyn «Apl construction» JShS júrgizedi. Aýyldy tolyqtaı qamtamasyz etý úshin 10 gaz taratqysh salynýǵa tıis. Sonyń segizi ornalastyrylyp, taǵy bir gaz taratqyshtyń qurylysy júrip jatyr. Gazdandyrý jumystary 2026 jyly tolyǵymen aıaqtalady.
Almaty oblysy