Bıyl da ádettegideı Prezıdent Joldaýynyń basym bóligi halyqty áleýmettik qoldaý salasyna arnaldy. Qasym-Jomart Kemeluly el turǵyndarynyń ál-aýqatyn kóterý máselesin únemi jiti nazarda ustap keledi. Sonymen qatar kelesi jyldy «Jumysshy mamandyqtary jyly» dep jarııalaýy da halyqtyń áleýmettik jaǵdaıyn jaqsartýǵa baǵyttalǵan ıgi qadam dep aıtýǵa tolyq negiz bar.
Shyn máninde, biz ınfraqurylym men ekonomıkany damytý týraly aıtqanda eń birinshi kezekte bilikti mamandardyń jetispeýshiligi degen máselege tap kelemiz. Barlyq salada qazir osyndaı kórinis. Sondyqtan Prezıdent bastamasy jumysshy mamandyqtarynyń bedelin kóterip, elge qajetti kadrlardy daıarlaýǵa arnalyp otyr.
Aıtalyq, bes jyl buryn jastarǵa kolledjde bilim alý úshin kóptegen grant bóldik. Biraq bul máseleni sheshti me? Shynyn aıtý kerek, jumysshy mamandyqtaryna jastar kóp qyzyǵa bermeıdi. Onyń bedeli aıtarlyqtaı joǵary emes. Tipti grant sany men shákirtaqynyń óskenine qaramastan, kolledjde oqýǵa ynta bildirýshiler qatary az. Sondyqtan bul Joldaýynda Prezıdent jumysshy mamandyqtaryn qoldaý týraly aıtty. Tipti osy salanyń úzdikterine arnalǵan memlekettik nagradalar engizilmek.
Jumysshy mamandyqtaryna qyzyǵýshylyqtyń tómendigine eń basty sebep – jalaqynyń azdyǵy. Salystyrmaly túrde aıtsaq, biz buǵan deıin muǵalimderdiń jalaqysy tómen bolǵanyn bilemiz. Sonyń saldarynan bul mamandyqqa kóbinese ulttyq biryńǵaı testileýde shekti baldy áreń jınaǵan, ıaǵnı úlgerimi tómendeý túlekter keletin. Al olardan qandaı ustaz shyǵady? Keıin biz salada túbegeıli reforma júrgizip, olardyń jalaqysyn birneshe esege ósirip, qajetsiz jumystardan aryltqanda jaǵdaı múldem ózgerdi. Búgingi tańda muǵalim mamandyǵyna túsip jatqan talapkerlerdiń ortasha jınaıtyn baly 100-den asyp jyǵylady. Sondyqtan kez kelgen mamandyqtyń jastar tarapynan qyzyǵýshylyq týdyrýy úshin, eń aldymen, onyń jalaqysyn kóterý kerek.
Bıyl jazda óńirlerde bolǵanymyzda elimizde dánekerleýshi, kran mashınısi, sý joly qyzmetkeri, slesar sekildi qajet mamandardyń jetispeıtinin kórdik. Sebebi sol – olardyń jalaqysy az. Sondyqtan ol mamandyqtarǵa eshkim barǵysy kelmeıdi. Qazir Parlament tarapynan qabyldanǵan normatıvtik-quqyqtyq baza bul baǵytta jumys isteý úshin jetkilikti. Zańdar bar, endi atqarýshy organdar biz aıtyp otyrǵan jalaqy máselesin kóterý jaǵymen shuǵyldanýy kerek.
Ashat AIMAǴAMBETOV,
Májilis depýtaty