«Birlik kerýeni» Astanaǵa jol tartty

Oblys ákimi Nurlybek Nálibaev «Syr ana» moný­mentindegi «Bir­lik kerýeni» is-sharasyna qaty­syp, oıynshylarǵa sáttilik ti­ledi.

«Memleket basshysy Qasym-Jomart Kemeluly «Qazaq­standaǵy Dúnıejúzilik kósh­peliler oıyndary iri oqıǵa bolmaq. Olar ulttyq sport pen salamatty ómir saltyn nasıhattaý úshin de, baýyrlas ha­lyq­tar – Uly dala kóshpeli ór­kenıetiniń muragerleri ara­syndaǵy mádenı jáne gýma­nıtarlyq baılanystardy ke­ńeıtý úshin de mańyzdy», dep atap ótkenin bilesizder. Dúnıejúzilik kóshpeliler oıyn­dary aıasynda búginge deıin túrli deńgeıdegi 80-nen asa is-shara uıymdastyryldy. Sý alý rásimi kóneden kerýen tartqan, kóshpeliler órkenıetiniń tarıhynan syr shertetin qart Qa­rataýdyń etegindegi Sa­ýys­qandyq shatqalynda ótki­zildi. Baǵzy babalardan qal­ǵan arheologııalyq mura – Sa­ýysqandyq petroglıfteri qa­dym zaman kýágeri. Bizdiń za­ma­nymyzǵa deıingi II myńjyldyq basynda Uly dalanyń baıraqty uldary ómir tirshiligin tasqa qashap jazyp, álemdik rýhanııa­t pen mádenı muraǵa ólsheýsiz úles qosqan shatqaldan bastalǵan sý alý rásimi búgin Qyzylorda qalasynda jalǵasyn taýyp otyr. Syr óńirinen Astana qalasyna attanatyn kıeli sýdy jetkizetin batyrlarymyzdyń, senim artqan elshilerimizdiń sapary sátti bolsyn», dedi óńir basshysy.

Nurlybek Nálibaev kerýen kóshbasshysy, «Qazaqstan barysy» Maqsat Isaǵabylovqa torsyqqa quıylǵan sýdy tabys­tap, saıysta sáttilik tiledi.

«Syr ana» monýmetinde uıymdastyrylǵan saltanatty is-sharaǵa jıylǵandar Syr­dan elordaǵa attanatyn batyr­lar men elshiler kerýenin qoshe­metpen shyǵaryp saldy. Sán-saltanatymen saparǵa attanǵan kerýen Beıbarys sultan dańǵy­lymen júrip ótip, jolǵa tústi.

Sanany serpiltip, tarıhı jadty jańǵyrtatyn aýqymdy is-sharada Syr óńiriniń atynan 3 sport túrinen 4 jerlesimiz saıysqa túsedi. Jalpy, 7 kúnge sozylatyn jarystarǵa 100-den asa elden 3 myńǵa jýyq qa­ty­sýshy keledi.

QYZYLORDA