Memleket basshysy Qasym-Jomart Toqaev halyqqa Joldaýynda «Jaıly mektep» ulttyq jobasynyń júzege asyrylýynyń mańyzdylyǵy men qajettiligin atap ótti. Joba aıasynda «Samruk-Kazyna Construction» aksıonerlik qoǵamyna asa úlken jaýapkershilik júkteldi.
Búgingi tańda biz jobanyń sońǵy kezeńine aqyryn ótip jatyrmyz. Birinshi qyrkúıekte alǵashqy mektepterdi qoldanysqa tapsyryp bastadyq. Qazir elimizdegi basqa nysandarda qurylys jumystary qarqyndy júrip jatyr. Atalǵan nysandardy jyldyń aıaǵyna deıin tapsyramyz dep josparlap otyrmyz.
Jergilikti bılik ókilderi ári merdiger uıymdarmen únemi baılanysta otyryp, júktelgen mindetterdiń sapaly ári ýaqtyly oryndalýyn baqylaýda ustap otyrmyz.
Atqarylǵan jumystyń nátıjesin qarapaıym halyq pen keleshek urpaq baǵalaıtyny belgili. Memleket basshysy Joldaýda «2025 jyldyń sońyna deıin zamanaýı úlgidegi 217 mektep paıdalanýǵa beriledi dep josparlanǵan. Osy óte mańyzdy jumysty «Samuryq-Qazyna» qory qadaǵalap otyr. Úkimet pen ákimder bul sharýaǵa belsene atsalysýǵa tıis» degen edi. «Samruk-Kazyna Construction» AQ strategııalyq turǵydan elimiz úshin óte mańyzdy «Jaıly mektep» ulttyq jobasynyń ár kezeńiniń sáıkes deńgeıde tyńǵylyqty oryndalyp, sátti aıaqtalýy úshin qoldan kelgenniń barlyǵyn jasaıdy. Jobanyń sapaly ári ýaqytyly tapsyrylý jolyndaǵy mınıstrlikter men jergilikti ákimshiliktermen jumyla atqarǵan jumystyń, baqylaýdyń bolýy, ári halyqtyń úzdiksiz keri baılanysy isimizdiń durys baǵytta júrýine jaǵdaı týǵyzyp otyrǵanyn atap ótken jón.
Máýlen Aımanbetov,
«Samruk-Kazyna Construction» AQ basqarma tóraǵasy