Mal sharýashylyǵyn kúnkóris kózine aınaldyrǵan Aspantaý aıasynyń jurtshylyǵyna qazir shóp shaýyp, astyq orý naýqanynyń qyzyp turǵan shaǵy. Bıyl jaýyn-shashynnyń mol túsýiniń arqasynda shóp qunarly shyqqanyn aıtady sharýalar. Qystyń qamyn jaz oılaýǵa kirisken sharýalar da shalǵy syrylyn údetip, salǵan shómeleleri men baýlanǵan shópteri qazdaı tizilip jatyr. Sonyń biri Tasashy aýyldyq okrýgine qarasty Sarykól eldi mekenindegi «Nurqanat» sharýa qojalyǵynyń da jumysy qarqyn alǵan.
Mal basyn kóbeıtý arqyly otbasylyq kásipti dóńgeletip otyrǵan qojalyq basshysy Nuqanat Mamytaqynov 2017 jyly «Nurqanat» sharýa qojalyǵyn qurǵan. Qaramaǵyndaǵy mal basyn kóbeıtip, sharýashylyǵyn keńeıtýdi dittegen sharýa qystyń qamyna kirisip ketken. Shapqan shópterin jınap, qystaqqa tasyp alý qamynda júrgen otbasylyq kásip ıeleriniń tynymsyz tirligi súısintedi. Aǵaly-inili eki azamattyń biri tań bozynan traktoryn «tizgindep» shóp shaýyp júrse, endi biri shabylǵan shópti baýlaýda bel jazbaı jumys isteıdi. Shóbi shúıgin shabyndyq tósindegi qojalyq jetekshisi Nurqanat pen inisi Nurlannyń shaýyp, baýlaǵan shóbi «IýMZ-6» tehnıkasymen tasymaldanady.
«Shildeniń ortasynan aýa shabyndyqqa shalǵy túsirdik. Byltyr osy 40 gektar shabyndyq jerden 85 dana baýlanǵan shóp jınalǵan. Bıyl buıyrsa, mólshermen 100 oramnan asa alýdy josparlap otyrmyz. Bir býylǵan shóptiń ortasha salmaǵy shamamen 250-280 kılodaı bolady. Qazir qojalyqqa qarasty «Dardamty» jerin shaýyp jatyrmyz. Shóptiń túsimi byltyrmen salystyrǵanda áldeqaıda joǵary. Bıyl ylǵal mol bolyp, shóp bitik shyqty. Aýa raıy ashyq bolsa shabyndyqty bir apta aralyǵynda aıaqtap, «Temirli saı» dep atalatyn shabyndyqqa jyljımyz. Onyń kólemi 80 gektar», deıdi sharýa qojalyq ıesi.
Almaty oblysy,
Kegen aýdany