Senat depýtattary Álibek Náýtıev pen Saǵyndyq Luqpanov Atyraý oblysynyń turǵyndarymen kezdesti jáne Qazaqstanda AES salý máselesin talqylady. Kezdesýlerdiń maqsaty halyqty atom energetıkasynyń artyqshylyǵy týraly habardar etý jáne aldaǵy referendýmǵa belsendi qatysýǵa shaqyrý boldy, dep habarlaıdy Egemen.kz.
Senatorlar kezdesýler barysynda AES qurylysy óńirdiń jáne tutastaı alǵanda búkil elimizdiń ekonomıkasyna qalaı oń áser etetini jaıynda egjeı-tegjeıli túsindirdi. Jańa jumys oryndaryn ashý, energetıkalyq qaýipsizdikti qamtamasyz etý, syrttan keletin energııaǵa táýeldilikti azaıtý jáne ekologııalyq taza energetıkaǵa kóshý sııaqty artyqshylyqtar atap ótildi.
Turǵyndar pikirtalasqa belsendi qatysyp, atom stansııasynyń qaýipsizdigi, olardyń qorshaǵan ortaǵa jáne adamdardyń densaýlyǵyna áseri týraly suraqtar qoıdy. Depýtattar Qazaqstanda AES qurylysy halyqaralyq qaýipsizdik standarttaryna qatań sáıkes júzege asyrylatynyn atap ótip, barlyq suraqtarǵa tolyq jaýap berdi.
«Atom elektr stansııasyn salý – bizdiń memleketimiz úshin strategııalyq mańyzdy sheshim. Bul Qazaqstannyń energetıkalyq táýelsizdigin qamtamasyz etip qana qoımaı, jańa tehnologııany damytýǵa jáne joǵary tehnologııalyq jumys oryndaryn ashýǵa sony serpin beredi», dep atap ótti senator Náýtıev.