Bıylǵy Joldaýda Prezıdent Qasym-Jomart Toqaev elimizdiń damý barysyndaǵy óte ózekti máselelerdi meılinshe tolyǵymen qamtydy. Ásirese Memleket basshysynyń orta bilim berý salasyna da aıryqsha toqtalyp ótkeni pedagog retinde meniń kóńilime qondy.
«Jaıly mektep» jobasy aıasynda 2025 jyldyń sońyna deıin elimizde zamanaýı úlgidegi 217 mektep salynyp, paıdalanýǵa beriletini qýantty. Osy ózekti másele Úkimet pen jergilikti ákimdikter belsene atsalysýǵa tıis ekeni erekshe tapsyrma retinde qozǵalyp, depýtattar da ortaq isten shet qalmaý kerektigi aıtyldy.
Úkimetke jaıly mektepterdi arnaıy basqarý júıesin engizýdi oılastyrýy kerektigi tapsyrylyp, sonymen birge elimizdegi 1 300 mektepke kúrdeli jóndeý júrgizý qajettigi júkteldi. «Úkimet ákimdermen birge ony qarjylandyrý kózderin anyqtap, sonyń ishinde demeýshilerden de qarajat tartyp, 3 jyl ishinde bul mektepterdi tolyq jańartýy kerek», degen Prezıdent bilim sapasyna aıryqsha mán berdi.
О́ıtkeni elimizde áli kúnge deıin úsh aýysymda oqyp jatqan, jóndeýdi qajet etetin, ahýaly kúrdeli bilim oshaqtary barshylyq.
Qazirgi zamanda oqýshylardyń, aýyl mektepteri balalarynyń da zamanǵa saı bilim alýǵa tolyq quqyǵy bar. Kez kelgen oqýshynyń bilim alý quqyǵy shektelmeýi kerek. Prezıdent osy máselelerge, ásirese aýyl azamattarynyń eńbekpen, jumyspen qamtylýyna, áleýmettik jaǵdaıynyń kóterilýine, mektepke deıingi jastaǵy balalardyń mektepke qandaı daıyndyqpen keletinine erekshe kóńil bóldi.
Memleket basshysy «Ustazdar – ulttyń zııatkerlik qýaty. Olar bilimdi urpaq tárbıeleý arqyly elimizdiń órkendeýine jol ashady. Úzdik oqý baǵdarlamasy, zamanaýı mektepter, ozyq basqarý júıesi bolsa da, ustaz bilikti bolmasa, onyń bári beker ekeni anyq» degeni kópshiliktiń kóńilindegini dóp basty.
Qandaı keremet baǵdarlama bolsyn, qandaı keremet sońǵy úlgimen jabdyqtalǵan mektep bolsyn, ondaǵy bilim sapasyndaǵy sheshýshi tulǵa qashanda muǵalim bolyp qala bermek. Orta bilim berý sapasy elimizdiń keleshegin aıqyndaıdy. Iаǵnı oqýshy 11 jylyn mektepte ótkizedi. Onyń osy ýaqyt aralyǵynda úlgi-ónege alatyn tulǵasy – ustaz.
Jaqynda ǵana bir zertteýden oqýshynyń muǵalimnen alǵan bilimi, tálimi onyń mektepten keıingi ómiriniń jıyrma jylyna áser etetinin oqyp edim. Iаǵnı túlektiń keleshek jıyrma jylynda bolǵan ózgeristerge ustazdyń kezinde bergen tálim-tárbıesi kóp mánge ıe.
Prezıdent qaı maman bolsyn óziniń isine adal, jaýapkershilikpen qyzmet etýine erekshe basymdyq berýi kerek ekenin aıtty. Sondyqtan ustazdar qaýymyna bul jaýapkershilik eki ese júkteledi.
Mektepterde qazir «Birtutas ult» tárbıe baǵdarlamasy júrgizilip jatyr. Prezıdent Ulttyq quryltaıda aıtyp ótken otanshyldyq, jasampazdyq, zań, tártip, kásipqoılyq, eńbekqorlyq qundylyqtarynyń negizinde barlyq mektepte ata-analardy qoldaıtyn ortalyqtar qurylyp, jan-jaqty keshendi júzege asyrylyp keledi.
Baıan BAZARǴALIEVA,
Daryndy jasóspirimderge arnalǵan «Bilim-ınnovasııa» lıseı-ınternatynyń muǵalimi
Aqtóbe oblysy