Prezıdent Qasym-Jomart Toqaev Astanada ótip jatqan barlyq deńgeıdegi máslıhattar depýtattarynyń II respýblıkalyq forýmyna qatysyp jatyr, dep habarlaıdy Egemen.kz Aqorda baspasóz qyzmetine silteme jasap.
«О́kildi bılikte áıelderdiń qatary kóbeıe tústi. Elimizde qyz-kelinshekterdiń bastamalaryna jan-jaqty qoldaý kórsetilip jatyr. Áıelderdiń quqyǵyn qorǵaýǵa basa nazar aýdarylyp otyr. Osynyń bári reformanyń naqty nátıjesi ekeni sózsiz», dedi Prezıdent.
Memleket basshysy eldegi saıası reforma partııalardyń aımaqtaǵy belsendiligin arttyrǵanyn tilge tıek etti. Olar oblys, aýdan ortalyqtarynda qarqyndy jumys isteı bastady. Osylaısha azamattardyń saıası úderiske keńinen aralasýyna múmkindik týdy.
«Jer-jerde túrli másele týraly ashyq talqylaýlar ótip jatyr. Basqasha aıtsaq, pikir alýandyǵyna jol ashyldy. Jurt jergilikti máselelerdi sheshýge belsene atsalysatyn boldy. Bul «Halyq únine qulaq asatyn memleket» qaǵıdatymen tolyq úndesedi», dedi Qasym-Jomart Kemeluly.
Prezıdent aıtyp ótkendeı, saıası reformalardyń nátıjesinde máslıhattardyń quzyreti de keńeıe tústi. Depýtattar oblystyń jáne respýblıkalyq mańyzy bar qalalardyń ákimderin balamaly negizde tańdaıtyn boldy.
«Atqarýshy bılikke yqpal ete alatyn basqa da quzyretter berildi. Sondyqtan máslıhattar aımaqtyń áleýmettik jaǵdaıyna ákimdiktermen birdeı jaýapty. Depýtattar ókildi bılik fýnksııasyn halyqtyń senimine saı joǵary deńgeıde atqarýy kerek», dedi Memleket basshysy forým barysynda.