Memleket basshysynyń pármenimen júzege asyp jatqan «Aýyl amanaty» baǵdarlamasy qazir ár óńirde óz nátıjesin berip jatyr. Atalǵan joba aıasynda oblysta myńǵa jýyq turǵynǵa shaǵyn nesıe berilgen. Sonyń biri ári biregeıi Qarasaı aýdany Eńbekshi aýylynyń turǵyny Amankeldi Kójebaev der edik.
«Kásibimdi keńeıtýdi kópten oılap júrgenmin. Biraq qarjy tapshylyǵy qolbaılaý boldy. «Aýyl amanaty» baǵdarlamasynyń júzege asýy qolymdy uzartty. Qolyma tıgen 8 mln teńgege bıznes-josparymda kórsetilgen úlken pesh, kondıterlik arnaıy ústelder men tońazytqysh sııaqty eń qajetti qural-jabdyqtardy shetelden tapsyryspen satyp aldym. Memleket tarapynan osyndaı múmkindiktiń bolyp jatqany qýantady», deıdi Amankeldi Kójebaev.
Aıtýynsha, ónimine turaqty suranys bar. Sondaı-aq kásibin keńeıtýdiń nátıjesinde jumysshy qatary kóbeıgen. Bastapqyda 4 adammen jumysyn bastaǵan kondıterlik sehta búginde 10 adam eseli eńbek etedi.
Sehqa kelgen jumysshylar aldymen synaq merziminen ótedi. Tolyq úırenip, beıimdiligin baıqatady. Kásibi unap, ári qaraı jumysyn jalǵastyrýǵa nıetti bolsa, resmı túrde qujatpen jumysqa qabyldaıdy.
«Aýylda eńbek etkisi keletin adam az emes. Eger aldaǵy ýaqytta budan da joǵary deńgeıde damıtyn bolsaq, eńbek adamdarynyń tabysy artyp, turmysy da jaqsarady», deıdi kásipker.
Aýyldastarynyń áleýmettik-turmystyq jaǵdaıynyń jaqsy bolýyn qalaıtyn arda azamat keleshekte jumysshy sanyn 30-40-qa jetkizýdi oılastyryp otyr.
Aýyldaǵy aǵaıynnyń qam-qareketin kúıtteıtin «Aýyl amanaty» baǵdarlamasy jyldyq 2,5 paıyz syıaqy mólsherlemesimen 5 jylǵa deıingi merzimge shaǵyn nesıe berýdi kózdeıdi. Mal sharýashylyǵy salasyndaǵy jobalar úshin shaǵyn nesıe merzimi – 7 jyl. Shaǵyn nesıeniń eń joǵary somasy – 2,5 myń aılyq eseptik kórsetkish (2024 jyly – 9,2 mln teńge), aýyl sharýashylyǵy kooperatıvterin damytý úshin – 8 myń AEK (2024 jyly – 29,5 mln teńge).
Ár óńirdegi senim bildirilgen ókil bolyp sanalatyn áleýmettik-kásipkerlik korporasııa baǵdarlama qatysýshylarynyń neǵurlym jeńildetilgen shaǵyn nesıege qol jetkizýine kómek beredi.
Almaty oblysy