Sarykól qalasynyń 36 jastaǵy turǵyny patrýldik polıseılerdiń toqtaý týraly talabyn elemegen. Keıin er adamnyń mas kúıde bolǵany jáne júrgizýshi kýáligi bolmaǵany belgili bolǵan, dep habarlaıdy Egemen.kz.
Anyqtalǵandaı, er adam kóliktiń aldyńǵy dóńgelegi jarylǵanyna qaramastan, basqa júrgizýshilerdiń ómirine qaýip tóndire otyryp, kóshelerdi aralap júre bergen.
«Polıseıler adam shyǵyny men aýyr zardaptardyń aldyn alyp, jol qozǵalysy erejelerin buzǵan júrgizýshini toqtatty. Alaıda, ustaý kezinde quqyq buzýshy óz kóligi men polısııanyń qyzmettik kóligine zaqym keltirgen. Qujattardy tekserý kezinde júrgizýshiden alkogoldiń ıisi shyqty», dep habarlady Qostanaı oblysy IID baspasóz qyzmeti.
Er adam kólikti mas kúıinde júrgizgeni úshin 6 jylǵa deıin bas bostandyǵynan jáne ómir boıyna júrgizýshi kýáliginen aıyrylýy múmkin.
Sonymen qatar polıseılerdiń kólikti toqtatý týraly zańdy talaptaryn elemegeni úshin sot ony 15 táýlikke qamaýǵa alý týraly úkim shyǵarǵan. Er adam arnaıy ýaqytsha ustaý ızolıatoryna qamalǵan.
Aıta keteıik, jol polısııasynyń málimetinshe, jyl basynan beri mas kúıinde kólik júrgizgen 1100-den astam júrgizýshi ákimshilik jaýapkershilikke tartylǵan. Kólik júrgizý quqyǵynan aıyrylǵan taǵy 66 mas júrgizýshige qylmystyq jaza taǵaıyndalǵan.